Kolasib Saidan-ah Unique Polling Station siam
![](https://zalen.s3.ap-south-1.amazonaws.com/images/news/1699261571_Unique%20polling%20station.jpeg)
Aizawl November 6, 2023 : Mizoram Legislative Assembly Inthlanpui, 2023 buatsaih tura Kolasib District chhunga polling station 89 awm zinga polling station dangdai bik (unique polling station) atana cheibawl, Government Chawngfianga Middle School, Saidan, Kolasib chu Kolasib (ST) Assembly Constituency Returning Officer John LT Sanga chuan a hawng.
Govt Chawngfianga M/S chu voter-te hip thei turin ngaw leh nungcha (forest) lam hawia cheibawl a ni a. Unique polling station bakah hian, intlar ngai lova vote thlak theihna model polling station 1 leh hmeichhe hlang duty-na (all women managed) polling station 10 buatsaih a ni bawk. Polling station dang zawng zawng pawh eng, tui thianghlim, inthiarna, ramp leh mamawh dang daha chei ṭhat vek a ni. Unique polling station chu ruahman a nih chhan ang taka hlawhtling taka hman a nih ngei a beisei thu Kolasib DEO John LT Sanga chuan a sawi a ni.
Govt Chawngfianga M/S-in an sikul hung chhunga sai lim ker (sculpture) an neih sa chu beh chhanin, unique polling station hi forest theme-a chei a ni a. District Election Officer hma laknain sai lim hi chei ṭhata rawng hnawih thar niin, tui chik chhuak reng thei turin fountain siam nghal a ni a. Sikul chung, a bang leh a chhehvel te chu thawm ṭhat ngai lai thawm ṭhain, rawng hnawih thar vek a ni a. Mi hip thei tur zawngin photo booth, lemziak, fountain leh a cheina thil chi hrang hrang siam a ni bawk a. Hei bakah hian, Environment, Forests & Climate Change, Kolasib Forests Division chuan sikul bangah ramngaw leh nungcha lem (mural painting) eng emaw zat ziakin, an chei thar bawk a ni.