Aizawl: Chief Minister Lal Thanhawla chuan nimin khan Kolasib Sports Complex, cheng nuai 2268.43 senna tur lung a phum. Lungphum inkhawm UD&PA Minister Zodintluanga kaih-hruai ah hian thu sawiin Chief Minister chuan sawrkarin thalai inkhel thiam chauh chher tum lovin eizawnna tlaka hmang turin hma a la mek tih a sawi a. Olympic Vision 2016 atan sawrkarin theihtawp a chhuah thu sawiin Mizote chu hnamdang aia thiam thil nei tha an nih thu a sawi bawk.UD&PA Minister Zodintluanga pawhin kum 2008-a Lal Thanhawla kaihhruai sawrkar a din atangin thalaite tan khawvel thar, kuthnathawktute tan rahbi thar leh kawngpui siamthat hna tam tak thawh a ni tawh tih a sawi a."CM hian thalaite tan khawvel thar din a nih theih nan hun leh tha tam tak a seng tawh a, Aizawl khawpuiah RG Stadium, Lammual leh a dang tam tak siam a nih hnuah District khawpui lamah tan kan la leh mek a ni," a ti. Sports Complex hi UD&PA Department te leh NBCC te tangkawpin an buatsaih niin, ni 23.5.2014 ah DPR hi Ministry of Urban Development ah thehluh a ni a, ni 8.10.2014 khan Ministry of Urban Deve-lopment, hnen atangin Sanction Order hmu nghal-in sum hi Rs. nuai 2268.43 a rawn sanction nghal a. Hei hi '10% Lumpsum Grants for North Eastern Region Including Sikkim' Scheme hnuai atanga hmuh a ni. Complex siam hna hi NBCC in a thawk dawn a, 8 lane synthetic tract, FIFA standard artificial grass football ground, gallery mi 15,000 thut theihna tur, Gym, Boxing hall, office leh parking etc. te siam a ni dawn a ni.