Spain international midfielder hian Nou Camp club tan kum tha tak a hmang mek a, Europe-a kum 21 hnuai lam footballer ṭha ber chawimawina dawng thei 20-na ni turin Golden boy atan thlan a ni.

England mi Jude Bellingham, Eduardo Camavinga leh Jamal Musiala khumin he lawmman dawng tur hian thlan a ni a, November 7 khian Turin khawpuiah lawmman hi hlan a ni ang.

Gavi hian Barcelona player nih laia dawng Lionel Messi (2005) leh nikum a dawngtu Pedri te hnung a zui. Tunhma lamin Erling Haaland, Kylian Mbappe, Joao Felix, Wayne Rooney leh Cesc Fabregas te pawhin he chawimawina hi an lo dawng tawh a ni.
 
Barcelona hmingthanna La Masia academy chhul chhuak Gavi hi 2021-22 season tir lam khan Barcelona B team aṭangin senior team-ah a kaisang ve chauh a ni. 

Coach Xavi hnuaiah tleirawl duhawm hian vawi 47 zet a khel tawh a, tun season-ah chuan La Liga leh Champions League-ah pawh nise a hmun pangngai a luah nghet tlat thei a ni. 

Spain tan international match 12-ah a inlan tawh a, Qatar-a World Cup lo awm turah pawh hmun pawimawh tak a chang ngeiin a rinawm.

Kar hmasa khan Gavi hian France Football lawmman semah Kopa Trophy a dawng bawk a, kum 21 hnuai lam player khel ṭha ber a ni.

Golden Boy awards hi Italian sports newspaper Tuttosport buatsaih a ni a, international jury, journalist leh football mithiam ten an thlang a ni.