Aizawl: Lengpui Airport thuamthatna hna hrang hranga KR. Construction, Thuampui leh Zoramchhana, Electric veng, Aizawl te hnena hna pek final estimate belhkhawm chu Rs. 41,77,48,855 a tling.

Assembly budget session neih mek a Serchhip bialtu MLA Lalduhoma zawhna, PWD changtu Chief Minister Zoramthanga’n ziaka a chhan danin, kum 2018-19 atanga tun inkarah KR. Construction, Thuampui, Aizawl hnenah, restricted tender hmang a PWD hnuaia hna chi hrang hrang pek tawh zat belhkhawm final estimate chu Rs. 40,92,95,776.04 a ni tawh a. Hemi hunchhung vek a Zoramchhana, Electric veng, Aizawl hminga hna pek final estimate belh-khawm pawh Rs. 74,76,02,268.07a tling.

Restricted tender tender hmanga KR. Construction hnen a hna pek tawh zawng zawngte chu 7 niin, nikum 2021 chhunga pek vek a ni a, chung zinga 4 chu Lengpui Airport thuam-that kaihhnawih a ni. 

KR. Construction hnenah vek hian kum 2019-20 khan PWD Saiha Division hnuaiah tender hmangin hna pahnih - work order amount Rs. 35,05,54,147, Chakhei to Siasi (20.00) Km F/C & Pavement works leh work order amount Rs. 12,16,87,-740 Chakhei to Siasi (20.00) Km permanent works te pek ni bawkin, tender leh restricted tender hmanga KR. Construction hna pek zawng zawng final estimate belhkhawm chu Rs. 88,15,37,663.04 a ni.

PWD changtu Chief Minister in ziaka zawhna a chhanna a tarlan a nih danin, kum 2018-19 inkar chhung vek a Zoramchhana, Electric veng, Aizawl hminga hna pek tawh zat chu 5 niin, chung hna te chu kum 2021 chhung a pek a ni a, hna a hmuh zawng zawng final estimate chu Rs. 74,76,02,268.07 a tling. Zoramchhana hnena hna pek dan zawhna leh chhanna ah tender emaw restricted tender emaw tarlan a ni lo.