Dr H L Malsawma
9436141437/9612887695

SEC (Synod Executive Committee) leh Theological Education Board, ATC kaltlanga Synod meuhvin Asia khawmualpuia Kraws Lian ber a phun tur hi tha ka ti a, ka thlawp e. Sawihawtna leh mi mal sawina kha ka lo ngaithla ve a, a ropui hle a, sawitu zawng zawng khan an thlawp vekin ka hria a a tha khawp mai.

LIAN LEH SANG: Gospel Centenary kum 1994 kan lawm dawn khan CENTENARY KHUANG LIAN kha a lar hle a, AIR-ah pawh vawi hnih ka sawi nghe nghe a, phur takin ka sawi a ni. 15/5/1993 khan Revd Chuauthuama, Lunglei lama Pro Pastor-a a awm laiin a lo kal ve a,  Rev Lalchhuanliana khatih laia Sr Executive Secretary te nen khan Ailawng khamtlang, Thawmpawnga Puk bul an thlenin kan zu kal a, a chungah mi 16 lai kan chuang a ni, video camera-in ka tin ran mai a, Revd Chuauthuama chu engnge a ngaihdan ka zawt a, “Pu Chuau, khuangpui kan buaipui hi engnge i ngaihdan, saw lamah thawmte a awm em?” ka ti a. Ani chuan, “Centenary Khuangpui in buaipui hi intifuh lutuk, chhim lamah pawh khuangpui hi a BORUAK siamtu ber a ni,” a ti ta mai a, ka lawm hle mai. Ani meuhvin Centenary Khuangpui kan buaipui a thlawp zawnga a sawi kha a ti lawmawm khawp mai, sawisel turah ka ngai deuh va! Rev Dr Zairema khan a atchilh tlat mai a, “Khawvela khuang lian ber (thing pum khat, remkhawm ni lo) kan siam tur a ni,” a ti deuh reng mai a. A lian ber bawk a, a hun takah kan zo thei a ni. Khuangpui kan hnuh chhung hi thla sarih teh meuh (1.3.1993- 17.9.1993) a ni. Gospel kum 150-na kum 2044-a kan lawm dawn chuan a tihawttu-ah KRAWS LIAN (Giant Cross) hi a tha hle ang a, a inhmeh hle bawk ang. Asia khawmualpuia lian ber tur ai chuan khawvel record tling turin Ft 500-a sang ti law law ila a duhawm hle mai. Kum 125-na kan lawm tawh lo leh nghal a.

Kraws sang leh lian ber, world record chu Spain khawpui atanga km 45 (Mel 25), Gudarrama tlanga ding khu a sang ber a, metre 150 chu Ft 492-a sang a ni. Guiness World Record bu phek 236-ah a awm; pawisa thawh belh hret ila, world record Kraws kan siam mai thei dawn a, a ropui khawp ang. Gospel kum 150-na kan lawm dawn a nih chuan tuna mite tam tak hi chu kan awm tawh dawn lo vang a, a ropui dang dai dawn em asin. Kum 10 emaw, kum 15 emaw pawh sa ila engnge a pawina, mi dang pawhin building sang an sak dawn chuan kum 20/30 te an hmang reng a ni.  

SANG DANG: 1. Chief Crazy Horse, USA-a mi chu khawvela thilsiam lian ber a ni, metres 172 Ft 563-a sang a ni.
    2. Sang ber mai chu The EIFFEL TOWER, Paris, France-a mi khu a ni a, France ram pawhin a hmingthan phah hle. Engineer Castave Eiffel-an kum 1930 vela a sak a ni, metres 300.5 ft 986-a sang     a ni.
    3. USA Newyork khuaa SKY CRAPPER khu khawvela insang ber a ni thin a, metres 115.2 ft 391-a sang a ni.
    4. SPINX GIZA, Egypt-a mi khu mtrs 73 ft 240-a sang a ni.
    5. CHRIST THE REDEEMER, Statue of Jesus Christ (Banphar lai), Rio de Janeiro, Brazil khawpuia an din khu a lar hle mai bawk a, Kraws chu a ni lo na a, Isua Banphar a nih avangin a lar a ni. Metres 38 ft 123-a sang a ni.

Mizoram Giant Kraws hi khawvela Kraws sang ber atan a itawm hle mai!! “Khuang lian ber kan nei tawh a, Kraws lian ber hi i buaipui law law teh ang u,” tiin ka rawn rawt e. Conference Centre inte hi a base-in khuh hlup mai se, a hnuaiah hall lian tak te, room eng emaw zat te, committee room thahnem takte dah bawk ila, Synod pawhin budget-ah te dah hial se la a tha dawn lawm ni? Kei chuan ka ti deuh, kan ti ta vek vek bawk a.

Gospel Centenary hnu deuh khan, “KHUANG MUSEUM siam ila, khuangpui kha a laiah dah ila, Presbytery leh Bial leh Kohhran malin centenary puala an siam hote kha dil ila, ATC ramah dah ila, enkawltu chowkidar ruat bawk ila,” tiin ka rawt hle thin a; mahse, a tlang zo ta lo a, a pawi hle mai. Gospel Centenary thil reng reng kha dil khawm ila, a hmuhnawm viau ang a, tunah hian kum 150-na emaw, 200-na emaw lawm dawn ta ila,  kum 100-na kan lawm dan kha kan enlet thei lo tluk a ni a. Museum kan lo siam lo kha a pawizia a lang tulh tulh. Nula Lalengmawiin Ft 8 aia sang mah dawhsan atanga nuho 4,000 rual zai a kaihruaite kha a dinna dawhkan leh photographer-ten thil kal thei dinchhana an hmante kha la khawm ila, museum-ah chuan dah tur a ni a; mahse, tunah chuan a chhe vek tawh. ‘Khuang Museum’ hi khawvela la awm lo reng reng a ni a, world record kan siam dawn a ni mai a, zin miten an en duh tak tur a ni ngei ang.

Synod meuhvin KRAWS LIAN a siam tur hi a ropui a, Kristianten Lal Isua Kraws hi kan rinna innghahna leh Kristiante chhinchhiahna ropui ber a nih avangin kan hlawkpui khawp ang a; zin mite hiptu pawimawh tak a ni ngei  bawk ang.