Lalchhandama Colney

Kan nghahfak Krismas kan lo hnaih leh ta, a lo thlen nan ni tam a awm ta lo. Tun kum chu COVID19 leh a kaihhnawih buaiin mi tinte kan buai kum tluan han ti ila kan tih sual em em ka ring lo. He ni lo thlen dawn meuh hi chuan par thei chi hrang hrangten par an chhuah a, chungleng savate leh sate paw’n hun hlim awm ber hmangin an lo hmuak ve a ni. Hetih lai hian thenkhatte chuan heng sate leh savate hi kan tina thin, luidungte pawh tûr hmangin nghaisak kan ching thin, a tha lo hle mai.

Aw le, hunpui kan thleng dawn a, a hmang turin nungcha chi tinrengte pawh an inbuatsaih ve a ni, i tina lo vang u. Keini pawh inbuatsaih ve ila, tisa lam inbuatsaihna ringawt ni lovin, thlarau lam pawh ti ila, hei hi a pawimawh em em zawk a ni, a duh dan zawk pawh a nih hmel.
Pathian zarah kum tam zawkte chuan ngaiah kan nei deuh tawh mai thei, eng pawh nise, he ni lo thlen meuh hi chuan mi tin mai hi min fan hlawm thin a ni.

Tun hma: Kum 1980 chho vel lai leh kum 1990 chho vel lai, kum 2000 hma lam a ni mai ang chu, ruaite kha khawpuiah pawh tum thum tum li dawn laite nawn a ni thin. Zaikhawmte pawh a tla tha ang reng thin hle a, tlaivar deuh thak thak a ni thin.

Ruai thehna tur hian hnah lak hnatlang hlim awm tak leh ropui taka neih thin a ni. Thalai pawl lamte paw’n carol service-te an buatsaih thin a. Halpuah, halmawi, etc. nasa taka hal thin a ni a, hei hi chu a tha lo hle mai.

Tin, nula,tlangval interek hrang,zu leh sa nena tha lo taka hmang an tam thin hle. Tlangvalten zu in ngei ngei tur emaw an ti a, nulate paw’n zahawmna hlauh phah nan an hmang bawk thin. Krismas thawmhnaw thar tur neih zawng zawngin kan lei a, thil dangte pawh kan lei a, kan inhmang ral deuhthaw thin, a zia lo ang reng hle mai.

Han sawi hmaih thil dangte pawh a la awm ang, duhtawk hrih mai ila.

Tun hnu: Tun hnu hian ruai hi nawn a ni ta ngai mang lo va, a ni tak phei hi chu thingpui ruai nen chauha hman thin a ni tawh a ni. Lengkhawm zai pawh hi a tla tha tawh lo hle, hmun thenkhatah phei chuan zai khawm tur awm mang loh chang a awm fo mai. Hetih lai hian kan ruai theh dan erawh a fel fai viau tawh mai, mahni thleng hran theuh neiin, fatute pawn lu an tuam a, kut fai takin an sil thin bawk.

Kan sawi hmaih hauh loh tur chu thilpek chungchang a ni. Mite kan luang chhuak nasa hle, home, centre, hospital, etc.-ah te thilpek pek kan intihhmuh a, a ropui hle mai. Hetih lai hian thisen pek (Blood Donation)lam erawh kan la chau rau ang reng hle.

Kawn chei mawi, kawtthler chei mawi kan ti nasa, a ropuiin a hmuh nawm thin hle mai. Heng en leh fang kual vel hian zan rei tak tak thleng mi kan insul pel zut zut thin a ni.

Krismas bazar pawh a lun thin hle; mahse, kan thil zawrhte a la to tlangpui viau mai. Krismas discount lam chu kan la uar vak chuang lo, Hindu-ho kan tluk lo a la nih hmel khawp mai.

Vawiinah: Krismas hman dan chi hnih awm theite han sawi ila. A pakhatnaah chuan berampute hman dan - vantirhkohin a hrilh dan en tur chuan an beramte kalsanin an kal thuai thuai a. Nausen puana tuam, ran chaw pekna thlenga mu chu an va hmu a. Chibai an buk a, Pathian fak leh chawimawi chung zelin an kir leh ta a.

A pahnihnaah chuan lal Heroda hman dan - a aia lal tur a nih avangin a huphurh a, khatih lai ram bial chhunga nausen zawng zawng chu a tihhlumtir ta vek a. Tichuan, Bethlehem khua zawng zawngah chuan tah leh hathialna, manganna nasa tak a lo thleng ta ni.

Aw le, keini pawh vawiinah engtin nge kan hman dawn le? Lal Heroda hman danin nge berampute hman dan in?

Tisa taka kan hman hian Heroda hman dan nen hian chung lam mit hmuhah chuan a danglam awm chuang lo ve. Hetih lai hian thinlung inngaitlawm tak leh inhawng taka kan hman chuan berampute hman danin kan hmang ve tihna a lo ni a, Pathian a lawm ngei ang.

Ber thla kan han thlena Krismas kan han thlen dawn meuh hi chuan rilruah lungduh kal tate an lo lang uai uai thin. He hun kan hman ho thin lai te, kan nuihho la te, rilruin a suangtuah a, mittui a tla tep thin a ni. Eng pawh nise, koh kir leh theih a ni tawh lo va, mahni inveng chungin, ‘han lunglen veng veng theihte pawh kha a nuam ve alawm,’ i ti mai teh ang.

Mi tin ta tur chanchin tha a nih angin he ni hi, hlep ruk ching tan pawh a ni a,zu in mi tan pawh a ni a, chutiang zelin mi zawng zawng sawm kan ni. Isua chuan, “Mi fel takte lam tura lo kal ka ni lo va, mi sualte zawk lam tura la kal ka ni,”a ti.

Sima a lam kan hawi phawt chuan min lo pawm duh vek a ni. Hmm.., sermon hluah dawn tlat mai, kan thu han tar lan takte kan hriat hnu a ni hlawm tlangpuiin ka ring; mahse, kan tangkaipui theih tho ka beisei.

Dam takin Krismas 2020 i hmang thei dawn, lawmthu sawi mawlh mawlh kan a, Krismas hlim takin le!!