Mizoten kumtina kan nghahhleh em em thin Krismas leh Kumthar chu kan lo thleng leh dawn ta reng mai a, he hun hi kum dang ang chuan kan hmang thei dawn lo tih a chiang reng tawh a, he hunpui hi kan buaipui mek Covid-19 hripui leng mek vang hian nasa leh zuala kan buai phah a hlauhawm hle a, chuvang kan fimkhur leh zual a hun ta khawp mai.

He hri leng avang hian sorkar pawhin inkhuahkhirhna (SOP) a neih sa pawh a hma aia khauh zawka kalpui a tum a, hei hi hunpui laia mipui ten hrileng laka harsatna lutuk kan tawh lohna tura ruahmanna a neih pawh niin a lang, chutihrual chuan a tuartu mipui zawk hian kan zawm tha tawk lovang tih a hlauhawm hle.

Sorkarin Standard Operating Procedure a neih mek hi a nihna takah chuan he hri laka kan him theihna tur hian zawm tha viau ila chu kawng tam taka chuan tun ai hian hri kai hi kan tlem leh zual ngei a rinawm. Mipui lam hian chhan hrang hrang avangin he hripui hi kan palzam chho hle ni hian a hriat a, thenkhat phei chuan hlauh ngaihna pawh a awm hran lo, ti hial te pawh an awm niin an sawi a, heng ngaihdan hi kan dahthat a hun tak zet a ni.

Khawvel hmun hrang hrangah he hri hian zual lam a pan zel a, a bikin Europe leh America lamah phei chuan an buai zual hle a, ram hrang hrangin hri danna hi pe chho tan mah se, vei hi an la tla hniam hlei thei lo. India ramah pawh Covid-19 hri kai hi an han tla hniam deuh thin mah se, a kai hi an pung leh zel a, chutiang bawkin Mizoramah ngei pawh hian hri kai hi a tlahniam hlei thei lo a, a hniam zawngin kan kal mai tura ngaih a nih hnuah kan pung leh thin a, tualchhunga kai hi a tam zawk kan nih chang a tam chho ta hle. Chuta karah hri kaina hriat loh an awm deuh reng bawk a, hei vang tak hian hunpui lai hian kan fimkhur a ngai tak zet a ni.

Covid-19 hri hi a tir lamah kha chuan natna lang kha chu sawi tham lek an nih laiin, tunlai chhovah hi chuan hri kai natna lang chhuak kan nei chho deuh ta reng a, natna enkawl lah hi a hautak hle a, chuvangin hunpui chhungin he natna hi a darh palh a hlauhawm leh zual a, harsatna nasa zawk tan tawrh a hlauhawm tak zet a ni. Chuvangin mipui lam pawh hian sawrkar thu tha taka zawm hi kan himna anih tih kan hriat a tha a, nuam kan tih zawng ringawta kan khawsak a fuh lo thei hle ang. Duh duh dana awm chu, duh loh dana awmna tih kha kan chungah a thlen lohna turin kan fimkhur a tul tak zet a ni.