CM-in hawng Ni 19.12.2016 (Thawhtanni) khan Chief Minister Lal Thanhawla chuan Darzokai Chhimtuipui Lei Rs. 3,15,04,700 senga siam chu a hawng. Rimawi Kutpui Ni 20.12.2016 (Thawhlehni) khan ni thum awh tur Jugalbandi Sangeetotsav, Hindustani rimawi kutpui chu Art & Culture Minister R.Romawia’n Vanapa Hall-ah a hawng. He rimawi kutpui hi Art & Culture Department leh Sangeet Natak Akademi, New Delhi tangkawp buatsaih niin, India rama civil mite chawimawina sang ber Bharat Ratna lo dawng tawh leh Sangeet Akademi Fellow ni bawk Ustad Bismillah Khan hriatreng nana buatsaih a ni. Sawifiah Ni 20.12.2016 (Thawhlehni) khan Finance Minister Lalsawta chuan Aizawl Press Club ah chanchinbumite a kawm a, Comptroller and Auditor General (CAG) report in Mizoram sawrkar in Lottery a kalpui dan a dikloh avanga vaibelchhe tam tak a hloh nia sawi chu sawifiahin sum hloh a awmlo niin a sawi. CIC Thar Ni 21.12.2016 (Nilaini) khan Mizoram State Chief Information Commissioner thar atan Lalduhthlana Ralte, Indian Foreign Service(Rtd) chu Raj Bhawan ah Mizoram Larsap Lt. Gen. (Rtd) Nirbhay Sharma chuan rinawmna thutiam tirin a la lut. Lalduhthlana Ralte hi kum 1956 October ni 17 khan piangin, kum 1983 khan Indian Foreign Service a zawm a, kum 33 chhung ram palai hna a thawh hnuin Ambassador Grade I-ah kaiin October ni 31 2016 khan a pension a ni. Thukhawm Ni 21.12.2016 (Nilaini) khan Chief Ministeu Lal Thanhawla, Mizoram State Planning Board, Chairman ni bawk kaihhruaina in State Planning Board chu Planning & Programme Implementation Department Conference Hall-ah an thukhawm. hawng Rs. nuai 85 chuang senga Aizawl Municipal Corporation (AMC) in Canteen kuala 'pedestrian flyover bridge' an siam thar chu ni 21.12.2016 (Nilaini) khan AMC Mayor PC Lalhmingthanga'n a hawng. Pedestrian flyover bridge hi NECS-in an dawh a ni a, lei hi mihring pung zel tur pawh dâwl zo tur leh lirnghing lakah pawh him tura siam a ni. HM-in hlan Ni 22.12.2016 (Ningani) khan Krismas leh Kumthar vuakveta ruihhlo dona atan Mizoram hmun hrang hranga YMA Branch ten an hman turin Home Minister R. Lalzirliana chuan Central YMA hruaitute hnenah cheng nuai 10 a hlan. Free wifi Ni 22.12.2016 (Ningani) khan Aizawl Mayor PC Lalhmingthanga chuan Aizawl College Conference hall-ah Aizawl khawpui chhung a Free Wifi hman theihna tur chu a hawng. PC Lalhmingthanga chuan Free Wifi chu zirlai, sumdawng leh khualzin miten tangkai tak a an hman a beisei thu sawiin, Free Wifi chu College ah te dah hmasak tum a ni tih a sawi bawk. No vehicle Zone Co ordination Committee on Traffic Management  ruahmanna in December ni 23&24, 2016 (Zirtawpni leh Inrinni) khan Zodin Square leh Chanmari kawn inkar ah lirthei tlan phallohna 'No Vehicle Zone' neih a ni a, mipui veivak an tam hle. MKHC-in duh lo Mizoram Kohhran Hruaitute Committee chuan ni 23.12.2016 (Zirtawpni) khan thuchhuah siamin Kristiante ni pawimawh Christmas ni a Good Governance Day hman chu an duhloh thu leh Kristiante thinlung tina lo turin remchang dang ruat zawk tur leh Christmas lawmna tibuai thei tur zawnga sawrkar function engmah siam lo turin thuneitute an ngen. MKHC chuan Central sawrkarin Good Governance Day atan December ni 25 a ruat chu Kristiante kutpui leh ni serh tih bawrhbanna anih avanga pawi an tih thu leh vanduaithlak an tih thu an sawi bawk. Bawlhhlawh nasa Mizoram Pollution Control Board in kum 2016 chhunga Mizoram boruak bawlhhlawh dan an zir chianna ah Mizoram boruak, a bikin Aizawl boruak chu kum hmasa aiin a bawlhhlawh lehzual niin an tarlang. Ruaitheh Mizoram hmun tam ber ah 26.12.2016 (Thawhtanni) khan Krismas lawmna atan Kohhran hoten ruai an theh. Pisa kai tlem Ni 27.12.2016 (Thawhlehni) khan sawrkar pisa hrang hrang leh Bank te chu hawn an ni a, mahse pisa kai an tlem bakah a dawrtu mipui pawh an tlem hle. Kawtthler ah pawh mipui leh lirthei veivak hmuh tur an tlem hle bawk.