ZALEN December 1, 2023 : Vawiin chawhma khan Civil Hospital, Aizawl Blood Bank-ah National Health Mission (NHM) mission director Dr Eric Zomawia'n kumin December thla chhung zawnga kalpui tur Mizorama blood bank hrang hrang-ah 'Krismas puala thisen pek' a hawng.

Krismas puala thisen pek hawnna inkhawm tâwi hi Association for Voluntary Blood Donation president C Lalnunnema'n a kaihruai a; hawngtu Dr Eric Zomawia chuan, AVBD leh an thawhpuite'n Krismas puala thisen pek an huaihawt thin chu damlo, thisen mamawhte tan a hlu tak zet tih sawiin, thisen hmanga mihringte chhandamtu Isua piang lawm nan leh mi dangte nunna chhan nan thisen pe turin Mizo thalaite a sáwm.

AVBD president C Lalnunnema chuan, Mizorama hunpui lai, Krismas leh kum thar vuakvetah páwl hrang hrangte an buai a, kum tharah pawl insiamrem lai a nih bawk avangin páwl hminga thisen pe pawh an tlem thin thu a sawi a, "Hengte avang hian kum 2010 atang khan Krismas puala thisen pek hi buatsaih thin a ni," a ti.

Krismas puala thisen pek hi AVBD, MSACS, NHM leh blood bank hrang hrangte huaihawt a ni a, hawnna inkhawmah hian Civil Hospital, Aizawl (CHA) medical superintendent Dr Zoramthanga, AVBD hruaitute leh CHA blood bank-a thawkte an tel.

December 2023 chhung zawng Krismas puala thisen pek hi kalpui a ni dawn a, blood bank-ah kalin thisen pek theih a ni a, thisen petute hnenah ei tur tuihnai tak leh thilpek pek zel a ni ang.

Vawiina a hawn ní-ah hian Mamawii Higher Secondary School NSS-te'n thisen unit 18 an pe nghal a, petute hmeichhia vek an ni.

AIZAWLA KRISMAS PUALA THISEN PEK TAWH DAN

No. Blood Bank   2019   2020   2021   2022

1. Civil Hospital, Aizawl 690   1,108   1,378   1,661

2. Synod Hospital   338   179   317   267

3. ZMC Blood Bank   64   26   128   N.A