Kristian movie 'Awma Ka Ni' tih chu October 26, 2023 (Niangani) zan khan Vanapa Hall-ah tlangzarh a ni ta. He film hi a taka thil thleng true story behchhana siam niin, veng leh khaw hrang hrangah show kalpui tum a ni. 

Tlangzarh hun hi Mizoram Home Secretary H. Lalengmawia chuan khuallian niin a hmanpui a, Vapa Hall-ah mipui thahnem tak an pungkhawm a ni. He film hi Lersia Play application-ah dah a ni dawn a, hemi hma hian show kalpui hmasak phawt a ni thung ang. 

He film director hi Vanlalawmpuia (Opix Renthlei), Dawrpui Vengthar a ni a, ani hian a script hi a ziak nghal bawk a ni. A story hi kum 2020 khan cell phone hmangin a ziak a, kum thum chhung an buaipui hnuin an tichhuak thei ta a ni. 

Film siam lama tawn hriat nei hnem tawh Kima Renthlei (obG production) chu cinematographer a ni a, belhchian pawh a dawl hle. 'Awma Ka Ni' hi Zothanpuia Sailo (Mr. Bond Entertainment) procuced niin, en manhla tak a ni. 

A changtute zingah hian film lama tawn hriat nei sawi tur an awm meuh lo a, mi thar kan hmu nual. Chutih rual chuan thalai thenkhatin an hmelhriat sa - PC Lallawmzuali, Jasmine Chinzah leh Jonathan Lalpeksanga Colney te chuan role pawimawh tak an play a ni. 

He film-in a tum ber chu Pathian awm ring lo leh rilru leh thlarau lama harsatna nei ten Pathian hmel an lo hmuh hi a ni a, entuten nunthar kawhhmuhtu a lo nih theih nan an hlan a ni. Sum siamna tur leh hlawkna ta tur uma buaipui an nih loh thu film buaipuite chuan an sawi.