Kristian movie chhuak thar tur a awm leh ta a, 'Awma Ka Ni' tih a ni. He film hi a taka thil thleng true story behchhana siam niin, an Bible chang innghahna hi Exodus 3:14 a mi 'Awma ka ni' tih kha a ni. 

He film director hi Vanlalawmpuia (Opix Renthlei) Dawrpui Vengthar a ni a, ani hian a script hi a ziak nghal bawk a ni. Film industry lama sulhnu la nei lo mi thar a ni nghe nghe. A story hi kum 2020 khan cell phone hmangin a ziak a, kum thum chhung an buaipui hnuin October 26, 2023 zan hian Vanapa Hal-ah an tlangzarh dawn a ni. 

Film siam lama tawn hriat nei hnem tawh Kima Renthlei (obG production) chu cinematographer a ni a, belhchian a dawl viau tura ngaih a ni. 'Awma Ka Ni' hi Zothanpuia Sailo (Mr. Bond Entertainment) procuced a ni bawk. 

A changtute 

A changtute zingah hian film lama tawn hriat nei sawi tur an awm meuh lo a, mi thar kan hmu nual dawn a ni. Chutih rual chuan thalai ten akn hmelhriat sa inlan tur an awm nual dawn - PC Lallawmzuali, Jasmine Chinzah leh Jonathan Lalpeksanga Colney te chuan role pawimawh tak an play dawn a ni. Lawmzuali leh Jasmine Chinzah te hi chu social media lamah kan lo hre fur tawh mai thei. 

He film-in a tum ber chu Pathian awm ring lo leh rilru leh thlarau lama harsatna nei ten Pathian hmel an lo hmuh hi a ni a, entuten nunthar kawhhmuhtu a lo nih theih nan an hlan a ni. Sum siamna tur leh hlawkna ta tur uma buaipui an nih loh thu film buaipuite chuan an sawi.

Premier zanah hian a duh a piang tan chhim theih a ni dawn a, ticket Rs. 100 man a hmunah lei tur a awm dawn a ni. Application lamah dah a nih hmain show kal pui tura ruahman a ni bawk.