ZALEN February 22, 2026: Mizoram Presbyterian Kohhran leh Baptist Church of Mizoram tangkawpten an buatsaih, Kristian Hla Bu-ah hla thar 70 dah belh tum a ni a, hetih lai hian 20 paih tum a ni bawk.

ZALEN-in Mizoram Synod hnuaia Kristian Hla Bu buaipuitute hnen atanga thu a dawn danin tuna hman mekah hian hla 600 a awm mek a, heng zinga sak ngai loh deuh hla 20 paih tum a ni a. Thalai lam hla leh Mizo irawm chhuak hla 70 belh tum a ni thung a, ruahman dan chuan hla 650 a awm tawh dawn a ni.

Hla bu buaipuitute chuan ZALEN zawhna chhangin, “Kan telh thar tur leh paih tur hi Synod Executive Committee-in a la final chiah loh avangin sawi mai a la rem lo a, chutihrual chuan hla 20 paih a, hla 70 belh tur chuan ruahmanna a kal mek a. Hla bua seng luh thar turte hi tunlai hla, thalai lamin an sak uar te an ni deuh ber a ni,” an ti.

Kristian Hla Bu thar chhutna atan hian Synod chuan Rs. nuai 70 a ruahman a, Mizoramah hla bu hi chhut theih a nih dawn loh avangin kumin kum tawp lam chuan hman theiha peih hman beisei a ni.

Kristian Hla Bu hi Presbyterian leh Baptist bakah kohhran dangte pawhin an hmang ve thin.

Kristian Hla Bu chhuak hmasa ber hi kum 1899-ah chhuah a niin hla 18 a awm a, Eureka Press, Calcutta-a chhut niin copy 500 chhut a ni a. A tir chuan sap ho kut chhuak hla dah a ni a, ‘Isua vana a om a’ tih chu hla pakhatnaah dah a ni.

Kristian Hla Bu hi tum eng emaw zat chhut tawh niin tuna hman mek hi kum 2005-a chhut kha niin 18th revised edition tih a ni a. Kum 2019 Synod inkhawmpuiah agenda a luh angin hla bu hi ennawn tan a ni a, final theih tura chhawpchhuah mek a ni.