ZALEN, Nov. 6, 2024: Worship Committee, Mizoram Synod hmalaknain Nilaini chawhnu khan Kristian Hla Bu App chu Rev. R. Vanlalnghaka, Synod Moderator-in tawngtaia hlanin a tlangzarh.

Kristian Hla Bu app hi Lailen Consulting Pvt. Ltd. siam niin kum 2021 Synod Inkhawmpuiin ‘siam ni se’ tia a pawm anga hmalak a ni.

Hla bu app-ah hian Kristian Hla Bua hla 600 dah luh a ni a, rimawi tumna hmanrua (instrument) hrang hrang ri thlan theih niin part hrang hrang (Soprano, Alto, Tenor, Bass)-in a riktir theih a, part mal chauh emaw, part thlan bik ri emaw pawha tihrik theih a ni a. Hla vuak ran zawng (tempo), hla key tihsan leh tihhniam (transpose) te a tih theih bawk.

Kristian Hla Bu mobile app hi Android leh iOS phone-a hman theih tura duan a ni a, kristianhlabu.com emaw, Google Playstore-ah leh Apple App Store atanga download theih a ni.

App hi phone atanga install hian hman hmasak berah hla hi a in-download phawt a ngai a, a hnu lamah erawh internet tel lo pawhin a hman theih zel tawh dawn thung.

La tihchangtlun zel tur a ni a, a app siamtute hian research ti chunga an siam thu leh he software/app hian hla hi staff notation atangin Tonic solfa-ah a let a, hetiang thei hi a hmasa ber a nih thu an insawi.