Aizawl October 28, 2023: ZPM chuan thuchhuah siamin MNF Party in tunhnaiah ZPM Leader Lalduhoma chu thudik lo leh belhchiandawl lo hmangin an bei nasa hle an ti a. ZPM Leader hi an bei duh a nih pawhin rinthu leh thudik lo ni lovin, thudik leh belhchiandawl ni thei se ZPM chuan an duh tih an tarlang.

ZPM chuan, "Kristian rama hetiang politics tawp leh bawlhhlawh tak chhawm nuna a awm zel tur hi ZPM chuan kan phal lo a ni. MNF Party hian politics tuinu, hmana an lo hlawhtlinpui tawh thin ang kha rawn tharthawh leh tum lo se kan duh hle a. Khawvel a thang zel a, tunah chuan mi an fing tawh a, engkim awlsam taka haichhuah zung zung theih tawhna hun, kum 2023 a ni tawh tih hre reng turin kan chah bawk a ni," an ti.  

ZPM thuchhuah chuan, "Hetianga ZPM leh ZPM Leader Lalduhoma dawt leh thu diklo pawh pawisa lova an bei chiam ta mai hi kum 2018-a an intiamna (Policy & Manifesto) ah tihhlawhtlin mumal sawi tur an neih loh vang leh kumin 2023 inthlan lo awm turah Policy leh Manifesto sawi tur an neih tak loh avanga ZPM Leader Lalduhoma chunga tuan taah ZPM chuan kan ngai a. Mizoram mipui ten sawrkar mai tura an ngaih ZPM leh ZPM Leader Lalduhoma sawichhiat chu an policy pui ber a ni ta ringawt mai a ni," an ti bawk.

Ngenna siamin ZPM chuan, "Kum 2018 inthlan dawna an intiamna hrang hrangte kha MNF Party hian tihlawhtling nise, tun ang hian an khawsak a ngai lo tur a ni a; anmahni tuhrah an seng a, anmahni thangah an awk a, an buai zo ta a ni ber. Heng zawng zawng thupbo nana, mipui rilru a diklo zawnga hruaikawi tumna hmanruaa ZPM Leader leh Chief Ministerial Candidate Lalduhoma hi hmang tawh lo turin kan ngen a ni," an ti.