Aizawl: Agriculture Minister KS Thanga chuan nimin khan NEDP sum hmanga State Referral Hospital, Falkawn-a hman tur khawl thar a hawng. Minister-in a hawn tak khawl te hi Ophthalmalogy (eye) OPD, Physical Medicine and Rehabilitation(PMR) dept. leh nau neihna (Labour Room) a hman turte an ni. K.S.Thanga chuan Referral hospital chu hmuh theihin a thang tih a sawi a. Tunhnaia Cabinet meeting in Medical College atana buatsaihna kal zelah hnathawktu thar 629 lai lak tura a pass tak chu sawrkar tan pawh hna hautak leh chona nasa tak a ni tih sawiin Medical college a awm theih nana sawrkar thil tih chu ropui a tih thu leh a bik takin a bial chhung Falkawn mite tan phei chuan malsawmna nasa tak a ni tih a sawi. KS Thanga chuan Medical College neih anih theihnana hma latu Chief Minister, Fininace Minister Lalsawta leh Health Minister Lal Thanzara te chungah lawmthu a sawi bawk. Khawl thar hawn inkhawm hi Dr. Lalhmuchhuaka Medical Superintendent-in a kaihruai a ni.