March 1, 2024; Ngopaa KTP General Conference vawi 60-na neih mekah vawiin chawhma khan rawngbawlna report inkhawm neih a ni a, heta tarlan a nih danin kum 2023 chhung khan KTP member boral mi 552 an awm.

Inkhawma general secretary in a tarlan danin, kum 2023 chhunga KTP member boral mi 552 zinga 484 chu mipa niin, hei hi za zela 87.68% a ni a, hmeichhe boral 68 awmin, hei hi za zela 12.32 a ni thung a; member thi tamna ber chu Kawnpui Chhimveng Bial niin, mi 12 an boral a ni.

Nupui pasal nei chhiarnaah chuan nikum 2023 chhung khan KTP member innei 3460 an awm a, an zinga 1541 chu Biak In hawnga innei an ni a, hmundanga innei 1919 an awm bawk a ni.

Mizoram chhungah KTP Branch 904 awmin, KTP member hi mipa 104736 leh hmeichhia 66,668 an vaiin, mi 1,71,404 an awm a ni.

Vawiin chawhnu khan Pandala KTP General Conference vawi 60-na, Diamond Jubilee pual Zaikhawmpui neih a ni a, zaninah vantlang Pathian Biak inkhawm neih leh a ni anga, Synod moderator Rev.R.Vanlalnghaka'n thuchah a sawi ang.

Naktukah rorel inkhawm leh kum 2024-2026 chhunga Central KTP hruaitu tur thlanna neih a ni dawn a, rorel hlan hian pandal ah "Thalaite rawngbawlna hmathlir' tih thupui zirho a ni ang.