Aizawl: Mizoram Kohhran Thalai Pawl lian ber Central Kristian Thalai Pawl chuan nimin khan Lammualah ram pum huap tawngtairual an nei. Ram pum huap tawngtai rual 2018 chawhma hun hi Rev. Dr. K.Lallawmzuala, Leader, CKTP chuan a kaihruai a, Synod Moderator Rev. F. Lalrinnunga hnen atangin Pathian thuchah ngaihthlak niin, Mizoram Synod Choir ten hun an hmang bawk. Tawngtai rual chhawng khatnaah hian KTP member, Pathian ngaihsak lo, member hlate leh ruihhlo ngaite pualin tawngtai rualna hun hman niin, ruihhlo ngaite leh a zuartute bakah ruihhlo dotu leh ruihhlo ngai enkawltu home hrang hranga thawktute tan hun hman a ni. Tawngtai chhawng hnihna hi CKTP Asst.Leader Upa Rosangliana chuan kaihruai ve thungin, Synod Executive Secretary Rev. B. Sangthanga hnen tangin Pathian thuchah ngaihthlak a ni a. Sual thupha chawina leh MLA General election 2018 thupui-ah hmangin tawngtai rualna neih leh a ni. Tawngtairual hi Aizawl bakah Mizoram khawpui hrang hrangah neih a ni bawk.