Aizawl July 4, 2024 : Vairengte, Bilkhawthlir leh Hachhek bial Kuhva Ching Association te chuan Myanmar Kuhva ip 9635 man tawh ni a sawi man a nilo leh Kudam atanga a bo deuh vek chu an hritthiam loh thu thuchhuah an siamah an tarlang.

Vairengte leh a chhehvela Foreign Kuhva Smuggling kudam atangin kuhva ip 9635 awm mek chungchang hi Dt.1.7.2024 khan Kolasib DC Conference Hall-ah, Kolasib DC John LT Sanga kaihhruainain sawiho a ni a. Meeting-ah hian Kolasib SP David Lalthangliana leh DC John LT Sanga, SDPO Vairengte, SDO (C) Vairengte leh Vairengte, Bilkhawthlir, Hachhek Bial Kuhva Chingtu Joint Committee aiawhte an tel.

Heng Foreign Kuhva Smuggling godown ami te hi chesawn tawhlo tur leh Dan anga hmalak tur a nih thu Kolasib DC leh SP chuan sawiin, hnatlang neih ngailo a thenfai thuai an tum thu leh hnatlang nei rihlo turin kuhva chingtute an ngen a. July 5, 2024 thleng lo nghak tura an ngenna chu zahawm tiin ni 5 hnu lama hmalakna a awmloh chuan resolution an pass tawh angin Kuhva Chingtute chuan kalpui an tum.

Beiseina sang tak nen sawrkar hmalakna an nghah mek laiin, Dt 2.7.2024-a Vairengte SDPO/OC leh Kuhva chingtu aiawhten kuhva ro godown-a chhekkhawl sa a kim leh kim loh enfiah a ni a, Kuhva ro ip 5741 lai mai chu lakchhuah a ni tih hriat a ni, Ip 3894 chiah a awm tawh tih hmuh chhuah a ni.

Hetianga an inremna bawhchhe zawnga Smugglers-te an che mai hi an hrethiam theilo a, Heng an inremna te pawh hi Foreign Kuhva humhim duh avanga ruahhmanna siamte pawh a ang an ti a. Kuhva chingtu farmers-te an zah loh zia leh an hmuhsit zia tilangtu ah an ngai. Inremna bawhchhe tute leh an thurualpuite hi sawrkar-in an chungah action ala ngam lo a nih chuan keini Kuhva Chingtute hian he ramah hian dikna chanvo an nei ve lo ang hialah an inngaih a lo ngai dawn an ti.

Vairengte, Bilkhawthlir, Hachhek Kuhva Chingtu Joint Committee chuan, Dt.6.6.2024 khan Joint Resolution siamin, "Mizoram chhunga Dan lo a kuhva lakluh stock-na Godown te hi June 30, 2024 ral hmaa titawp vek turin Mizoram sorkar kan ngen a. Sorkar-in Kuhva ro stock-te mana a titawp lo anih chuan Kuhva chingtuten aṭul angin hnatlang a ko ang." tih an lo pass tawh a ni.