Aizawl May 24, 2024 : Hachhek Bial Kuhva Chingtu Pawl (HBKCP) chuan thuchhuah siamin, an eizawnna ber Kuhva hralh kawnga harsatna siamtu, ramdang atanga dan lo a Kuhva tawlh luh a tawp theih nan nasa takin hma an la a. Kuhva ro tawlh ruk dan chhui turin Mizoram Police ni lovin CBI chu chhui turin an duh zawk.

HBKCP chuan, "Dan lo a Kuhva ro tawlh chungchanga Social activist Vanramchhuangi’n Gauhati High Court Aizawl Bench-a PIL a thehlut kha lawmawm kan ti a. He thubuai hi CBI ten chhui tura High Court a ngenna hi High Court-in a pawm ngei pawh kan beisei laia, Mizoram sawrkar-in CBI chhuitir lo a, Mizoram Police te chhuitir tura High Court-ah ngenna a siam ta mai hi pawi kan tiin Kuhva chingtute hmakhua a ngai tawk lo ah kan ngai. Kuhva ro chungchanga PIL hi CBI chhui remti ngei turin Mizoram Sawrkar kan ngen a ni," an ti.

Kuhva chingtute chuan, Kuhva tawlh ruk PIL chungchanga Gauhati High Court, Division Bench order Dt.22.1.2024 in a sawi anga kum 2021-a FIR thehluh tawh tun thlenga register anih loh chhan sawifiah tura a tih te, Case thara register theih a nih thu sawite hi bawhzui a, Court-in sawrkar chu he case hi a ngai thutak tawklo chu pawi an ti a. Kuhhnathawktute hmakhaw ngaia Kuhva chingtute tana huai taka ding a, hma la turin Mizoram sawrkar an phutin an ngen a ni.