Kolasib DC chuan Vairengte leh Chhimluang inkara dan loa kudam te chu a kalh sak a, heng kudamah hian dan loa tawlh nia rin kuhva leh urea te dah an ni thin a, tunah hian inthiarchhuahna hun pek an ni a, dan anga phurh an nih loh phei chuan bung- ruate chu man sak tum an ni bawk a ni.

Khawchhak lam atangin kuhva hi tam tak phurhluh an ni a, chungte chu Assam lamah tihral niin haw lamah leitha (urea) phurh chhoh nan lirtheite chu hman an ni leh a. He sumdawnna hi rei tak a kal tawh a, tlang hriat khawpa thang a ni a, media lamah te pawh tihchhuah a ni tawh a ni. An thil phurh karah hian bungraw tha lo eng eng emaw a tel thin nite pawha sawi a ni mek bawk. Kudam thenkhat phei chu kawngpui NH54 atanga lang thei khawpa hnaia sak an ni a, an huaisar hman hle a ni. Bungraw rit tak tak phur lirthei lian 150 dawnin ni tinin kan kawng an zawh a, kawng pawhin a tuar niin thuneitute chuan an sawi. Kuhva phurhluhte hi Mizoram ta tur chu nise khawpui lian ber Aizawlah hlan thlak deuh vek ni tur niin a lang a, chutiang ni loin Assam lamah phurh luh zel an ni thung a ni. Mizoram chu a kalkawng mai kan ni tih a chiang reng a, Mizo sumdawng thenkhatin hlawkna tel bawk mah se khawchhak leh kan state thenawm te’n dan loin sumdawnna atan kan ramchhung an hmang tih a lang bawk a ni.

He sumdawnna hian a nghawng thui hman hle a, tunhnai khan Assam police te chuan lehkha mumal a awm loh avangin kuhva phur te hi an man tak zauh zauh avangin Bilkhawthlir lamah an bun mai hlauhthawnna a awm a, hetiang hi a thleng a nih chuan helai bawra kuhva chingte’n an chhiat phah thei hial dawna hlauhna a awm hman a ni. Kuhva leh leitha tawlh sumdawnna chhui chiang tura Kolasib DC-in hma a la pawp mai hi a lawmawm khawp mai.

Kuhva leh leitha sumdawnna hi dan anga kalpui chi a nih chuan chhiah leh thildang te fel taka tiin kalpui ni sel a, a ni lo a ni lo a nih chuan tihtawp vat dan kawng dap a ngai tihna a ni. Leitha an phurh luhte phei chu dan khauh tak hmanga lak luh theih chauh nia sawi a ni a, chutihlaiin awlsam takin rampawna phurhchhuah turin a che reng lawi si a, he sumdawnna hian zung a kaih thuk hle a rinawm a, chak taka hmalak a ngai dawn a ni.