Aizawl May 26, 2024 : Myanmar atanga dan lova kuhva tawlh a nih loh nan Bilkhawthlir Kuhva Chingtu Co-Operative Society Ltd. chuan duty an la kalpui reng a. Khawchhak atanga kuhva tawlh an awm vang hian kumin hian kuhva lei tuma dawr pawh an la awm lo.

ZALEN-in Bilkhawthlir Kuhva Chingtu Co-Operative Society Ltd. hruaitute a biaknaah duty hi a tul angin an la kalpui reng niin an sawi a. “Kan bial hi a zau a, report kan dawn chuan Saipum, Khamrang, Bukvannei leh Bairabi thleng pawhin kan tlan dawr dawr mai thin a. Hetih lai hian kuhva hi a rukin a kal ve reng niin kan hria a, kuhva tawlhte pawh hian an tih dan thlakin tunhma lama truck lian a phur tawh lovin maxi cab leh car hmangte-in bag tam vak lo hian an thiar zeuh zeuh niin kan hria a ni,” an ti.

Mizoram tharchhuah aia khawchhak kuhva hralh a kal zawk chhan nia an hriat dan sawiin, “Khawchhak kuhva hi a pum a lian zawk a, a leitu company pawhin an duh zawk bawk a. A hralhna pawh hi a to zawk a, truck full load-a phurte hian Kolkata-ah an hralh hian nuai 30-te an hlep niin an sawi a; chuvangin, mi thenkhat hian a rukin an kalpui reng niin kan hria a ni,” an ti.

Khawchhak kuhva vang hian kuthnathawktute tharchhuah kuhva hralh kawngah harsatna nasa tak an tawk tih sawi bawkin, “Kum dangah chuan November leh December-ah hian hnam dang hnenah kan hralh vek tawh thin a. Kuminah erawh chuan a sen tan tawh chungin kum danga lei thin hnam dang tumah rawn kal an la awm lo a, kan hralh thei dawn nge dawn lo pawh kan la hrethiam lo a ni,” an ti bawk.

Mizoram khaw mala kuhva tharchhuak tam ber nia hriat, Bilkhawthlir khua hian kuhva hralhna atangin nikum khan vaibelchhe 25 vel hmuh theih an in beisei laiin Rs. 17,20,43,000 vel an lei chhuak a. Kuminah hian vaibelchhe 30 vel hmuh an inring a; mahse, khawchhak kuhva hi a luh reng chuan nikum lam pawh phak lo thei dinhmunah an ding niin Bilkhawthlir Kuhva Chingtu Co-Operative Society Ltd. hruaitute chuan an sawi.

Bilkhawthlir hi In 1,000 khua niin kuhva ching chhungkua 800-900 inkar vel an awm a ni.

Hachhek Bial Kuhva Chingtu Pawl (HBKCP) pawhin kuhva tawlhruk a la awm reng nia hriain duty leh an tum a. Dan loa kuhva ro tawlhte avangin an kuhva tharte hralh a harin a man a tlahniam zel niin an sawi a. Kuminah pawh kuhva rah lo zo vek tawh siin kuhva chingtu mi eng emaw zatin a man pawh an la dawng kim lo a ni tiin Mizoram sawrkar chu minimum support price a siam turah kuhva telh ve ngei turin an ngen bawk.

1. Bilkhawthlir Kuhva Chingtu Co-Operative Society Ltd. hian Dec. 10, 2022 khan special assembly neiin khawchhak atanga kuhva lut dang turin Dec. 14, 2022 atangin duty kalpui tan nise an ti a. Hun eng emaw chen an duty hnuah kuhva lut hi a ziaawm nia hriain an duty an chawlhsan.

2. Hun eng emaw chen duty an chawlhsan hnuah March 3, 2024 atang khan duty hi an kalpui leh a, kuhva phur eng emaw zat an man tawh.

3. Land Resources, Soil & Water Conservation department chhinchhiah danin Mizoramin kum khatah kuhva qtls. 1,87,703 vel a tharchhuak thin.