Aizawl July 8, 2024 : Vawiin khan Congress thalai hruaitute chuan Kolasib district-a Kuhva chingtute dinhmun leh tunhnaia Vairengte leh chhehvela Foreign Kuhva Smuggling kudam-a dah kuhva ip 5741 a ruka lak bo a hmunah kalin an enfiah.

Kuhva tawlhruk man khawm dahna tlawhtu MPYCC Senior Vice President Ngurdingpuia Pachuau chuan, "Mizoram chhunga Kuhva chingtu, rim tak leh hah taka an thawhrah pawh hralh hleih theih loha a awm chu pawi a tih thu sawiin, dan lova Kuhva tawlhrutute avanga harsatna namenlo an la tawk reng chu pawi a ti a. Vairengte, Bilkhawthlir leh Hachhek bial Kuhva Ching Association te'n sawrkarin Action mumal taka a lak ngam loh avanga mahni ram ngeia chanvo nei ve lova an inngai hial tawh hi a lungchhiat thlak a ni," a ti.

Congress sawrkar lai khan Kuhva chingtute ngenna angin khatih laia Chief Minister Lal Thanhawla khan Kuhva tawlh chu a titawp vek, tih sawiin Ngurdingpuia chuan, "MNF sawrkar kal ta chiahah khan Kuhva tawlh ruk chu nasa taka thar thawh leh niin ruihhlo pawh nasa takin a hluar nghal a, Mizorama ruihhlo man tam ber kum hial a thleng a. Midang aia danglam bik tura enchhin tura inzuar ZPM sawrkarah pawh nasa takin Kuhva leh Ruihhlo tawlh chu a hma aiin a hluar zui zel bawk a ni," a ti.

Home Minister K. Sapdanga'n Smugling thil hi thla khat chhunga tihtawp a tum a sawi chu lemchanna leh Media chakna hmanga intihlar tumna satliah maiah MPYCC chuan an ngai a. Kuhva ip heti zat a bo thei hian dan kenkawhna lama ZPM sawrkar a hlawhchham chian zia a tihlan bakah ZPM sawrkar thuneitute leh Kuhva tawlh rutute an inthurualin, sum hmanga in tham kualna a thleng ngei niah Congress thalai chuan an ngaih thu a sawi. Kudam-a Kuhva ip 3894 la awm mek pawh a bo leh mai Congress thalai chuan a hlauhawm a ti a, sawrkar ni lo, Kuhva chingtute zawkin he Kudam hi enkawl zawk se a him zawk MPYCC chuan an ring.