ZALEN July 9, 2026: Kulikawn Ngaizel phei chu kawng chhak lam min avangin kal tlang theih a ni lo a. Chhim lam kal tur tan Tlangnuam lamah kal tur a ni a, Chhim lam atanga Aizawl lut tur tan Saikhamkawn atangin CP Road zawh tur a ni.

Nimin khan K. Lalnghakliana Filling Station chhak chu kawng chhak lam atanga lei leh lung tla avangin kawng a hnawh a, engemaw chen then hman a nih hnuah a rawn tlakbelh leh a, tukin khan nimin lama a tlakna piah, Sakhamakawn lamah lung leh lei engemaw zat a tla leh a, thing tlu a awm nual bawk. He lung tla hian Bus, taxi, scooty, bike, pick-up leh tank lorry te a deng chhia a, mi pakhatin hliam a tuar bawk.

Kulikawn Local Council chuan Kulikawn Ngaizel a lung leh lei tla avanga hian thuchhuah an siam a, ruahsur nasat avangin Kulikawn Ngaizel phei hmun hrang hrang ah lung leh lei tla a awm a avangin Motor pawh tlan tir ngam awmloh khawpin lung tla a awm a, 9.7.2026 hian Disaster lama mithiam te leh Geology lama mithiam ten a hmun ah enfiah nghal tih an tarlang.

Drone Camera hmanga endik a nih hnuin Jai Jawan - Nghakliana Petrol pump ep ko sang chhip atangin lung tla mai thei a la awm nual a, heng lung leh lei tla maithei te hi khuain a zir loh avangin tih tlak theih a la nih lo a, ke a kal tan pawh a him lo a, Ngaizel a cheng te pawh fimkhur leh zual turin an ti a, he kawng hi a tlang loh avangin Tlangnuam lam atanga hel turin Mipuite an ngen a ni.