Saudi Pro League lar lem lo tak chu thla hmasa khan football khawvel-a pa lian ber pawl, Cristiano Ronaldo-a'n kum khata pound maktaduai 175 hlawh turin a zawm a, a zawm rualin Al-Nassr chu khawvel ngaihven an ni nghal. 

Tun hmain Middle East hi minor league ang chauh a ngaih a ni thin a, player ropui ber pawl an lakluh hnuah star dang Luka Modric, Marco Reus leh Sergio Busquets te chu Saudi Arabia pan turin sawi rik an ni nghal a nih kha. 

Hun rei tak chhung khelmual chhung leh pawna 'GOAT' (greatest of all time) inhnialna a Ronaldo khingpui Lionel Messi pawh kal thut mai thei anga sawi a ni lehzel. Argentinian superstar hi kum khata £ mtd 245 hlawh turin Al-Nassr khingpui lian ber Al-Hilal chuan an thlem mek niin an sawi.

Ronaldo hian a club thar tan debut a la khel thei lo va, a khelh loh chhan hi season hmasa United tana a khelh laiin Everton fan pakhat phone a vawm chhiat vangin FA-in match hnih chhung an hrem a ni. Mahse, ningani a Messi awmna team PSG nen friendly match an khelh hunah a vawi khat nan a inlan thei thung dawn.

He inkhel hi mi 68,752 lenna King Fahd Stadium-ah khelh a ni dawn a, fans lamin ticket an inchuh nasa dawn tih a chiang reng mai. 

ESPN chuan he inkhel hi online-ah ticket dilna maktaduai hnih chuang a awm niin an tarlang a, ticket an hralh chhuah atanga minute reilote chhungin an hralh zo vek nghal vek a ni.

'Golden ticket' an auction chu £ mtd 2.2-in sumdawng hausa Mushref Al-Ghamdi-a'n a lei hmiah bawk. Saudi General Entertainment Authority chuan 'golden ticket' hian ken tel tam tak neiin award semnaah a tel thei dawn bakah team pahnih inthlakna room-ah a awm ve theiin zanriah kilhona thlengin a tel thei dawn a ni. 
Messi tan hmun a awm dawn em?

Messi hi May thla khan Saudi Arabia ambassador turin kum khata pound mtd 25 hlawh tura contract ziah pui a ni a, he inkhel hian he lalrama a career leh sumdawnna kalpui a duh leh duh loh thutlukna siamna hun tha a pe dawn a ni.

World Cup a chawi hnua a match hmasa berah PSG tana goal khung leh nghal mah se PSG tan a khel zawm zel dawn em tih a la chiang rih lo. Argentina captain contract hi June thla khian a tawp tawh dawn a, PSG hnenah pawhsei a duh thu a sawi an tih laiin Saudi Arabia aṭanga ngaihventu te sawmna hi a hnar thei kher a ngem?

Middle East lam a pan ta lo a nih pawhin a naupan lai club Barcelona emaw MLS club Inter Miami te pawh a pan thut thei niin sawi an ni bawk.

Tun kar tir lam khan a pa Jorge chu, Riyadh khawpui-ah Al-Hilal nen inbiakna nei turin a awm nia sawi a ni a, a fapa in kum khata pound maktaduai 245 a hlawh theih dan tur chungchang an sawi niin an sawi. Messi-a'n Saudi club a zawm theihna chance hi tlem hle angin lang mah se, club lamin beidawn mai an tum lo niin an sawi bawk.