Lionel Messi hi football khawvelin a hmuh theih hringmi zingah chuan goal thuntu ropui ber pakhat a ni. Little magician hi mahni vanglai theuha goalkeeper te tana footballer hmachhawn huphurhawm ber pawl a ni tih a chiang.  

Barcelona lama a khelh chhung khan Messi hian competition hrang hrangah goal 672 zet a thun a, a ram Argentina tan international football-ah goal 80 a khung bawk. Paris Saint-Germain superstar hian ballboot a khai hmain goal 1000 a khung hman ngei rin niin 2010 leh 2020 chhunga goal thung tam ber a ni. 

Bayern Munich tana khawl ang maia goal khungtu Robert Lewandowski hi la naupang deuh seng chuan 2020s a lang thei tur khawpin a che tha a, mahse tunah kum 33 mi lai a nih tawh vangin atan beisei ngaihna a awm lo. Chutihrualin, goal thun thei tak pahnih Kylian Mbappe leh Erling Haaland te tan erawh beiseina sang tak a awm thei thung ang.     

Kum 1940 atanga 2020 thleng kum 10 chhung (decade) zela goal khung tam ber te chu:

1940s: Josef Bican (Slavia Prague, FC Vítkovice & Czechoslovakia) - 470 goals
1950s: Alfredo di Stefano (Millonarios, Real Madrid & Spain) - 301 goals
1960s:  Pele (Santos & Brazil) - 403 goals
1970s: Gerd Muller (Bayern Munich, Fort Lauderdale Strikers & West Germany) - 452 goals
1980s: Hugo Sanchez (San Diego Sockers, Atletico & Real Madrid & Mexico) - 315 goals
1990s: Romario (PSV Eindhoven, Barcelona, Flamengo, Valencia & Brazil) - 340 goals
2000s: Thierry Henry (Arsenal, Barcelona & France) - 313 goals
2010s: Lionel Messi (Barcelona & Argentina) - 579 goals