Kum 10 chhungin case 30,036 ziak lut || IPC-ah rukruk leh non IPC-ah MLTP tam ber

ZALEN October 13, 2024 : Mizoram Police chuan kum 10 kalta (2014 atanga 2023) inkar chhung khan thubuai 30,036 an ziak lut a. Police thubuai ziah luh zingah hian IPC hnuaiah rukruk case a tam ber a, Non IPC hnuaiah zu khapna dan (prohibition/MLTP Act) bawhchhia an tam ber thung.

Police record atanga a lan danin kum 2014-2023 inkar chhung khan Mizoram Police hian IPC hnuaiah thubuai 24539 an ziak lut a, Non IPC hnuaiah thubuai 5497 an ziak lut bawk. IPC hnuaia thubuai ziah luh zingah hian rukruk thubuai chu tam berin case 8983 ziah luh a ni a, hei hi IPC atanga thubuai ziah luh zawng zawng atanga chhutin 36.60% a tling a ni. IPC hnuaia thubuai ziah luh zingah hian in rawk (burglary) chu pahnihna a ni. Kum 10 kalta chhung vek hian Police chuan tualthah thubuai 288 leh pawngsual thubuai 435 an ziak lut bawk.

Kum 2014-2023 chhung vek hian Mizoram Police chuan Non IPC hnuaiah thubuai 5497 ziak lutin heng zingah hian zu khapna dan bawhchhia chu tam berin case 2203 an ziak lut bawk a, zu kaihhnawih case hi Non IPC atanga thubuai awm zawng zawng atanga chhutin 40% a tling a. Non IPC zingah hian ND&PS Act bawhchhiatna leh POCSO Act chu a langsar zual an ni bawk.

Chhinchhiahna atanga a lan danin IPC hnuaiah hian kum 2014 ah tualthah case 45 leh pawngsual case 125 ziah luh a ni a, hei hi kum 10 kalta chhunga a san ber tum a ni ve ve a. Rukruk case hi kum 2022 ah 1447 leh in rawk case hi kum 2022 ah vek hian case 1256 ziah luh ni bawkin kum 10 kalta chhunga a san ber tum a ni. Non IPC hnuaiah hian zu khapna dan bawhchhiat vanga man an tam ber kum chu 2021 kha niin hemi kum hian case 417 ziah luh a ni a. ND&PS Act bawhchhia an tam ber kum chu nikum 2023 kha niin case 274 ziah luh a ni bawk.

Kum 10 chhunga Mizoram Police-in IPC leh non IPC hnuaia thubuai ziah luh dan

Kum IPC Non IPC Total

2014 2263 452 2715

2015 2234 331 2565

2016 2429 437 2866

2017 2104 625 2729

2018 1804 584 2388

2019 2378 506 2884

2020 1804 513 2317

2021 2486 712 3198

2022 3699 574 4273

2023 3338 763 4101