Aizawl: Kum 2014-2015 chhung khan Mizo thalai mi 140 chu khawmual sipaiah lak an ni a, lawng sipai (navy)-ah mi 4 lak an ni bawk. Sainik Welfare & Resettlement department hotute chuan Mizoram chhungah sipai tan tumte puitu Coaching Academy neih a nih hnuah Mizo thalai sipai tang an tam zual phah niin Zalen palai an hrilh a. Coaching Academy te chu an hnuaia mi ni lo mah se an hriatpui thu sawiin, sipai lak runpui neih a nih dawna hriattirna an chhuah chang pawhin Aizawl khawpui chhunga Coaching Academy awmte chu tarlan tel thin a nih thu Zalen palai an hrilh bawk. Mizo thalai a tam thei ang berin sipai an tan theih nan hian theihtawp an chhuah thin thu Sainik Welfare & Resettlement department thawktute chuan Zalen palai hrilhin, Mizoram Youth Commission te nen tangkawpin tun hnaiah pawh College leh High School thenkhat ah Awareness campaign an neih mek thu an sawi a. Mizoram chhungah hna a van zia hriaa Mizo thalai a tam thei ang ber sipaiah tan tum se an duh thu an sawi bawk. Sainik Welfare & Resettlement department thawktuten Zalen palai an hrilh danin kum 2014-15 sawrkar kum chhung khan World War II indonaa tel mi 197 leh an nupui mi 683 hnenah tanpuina (financial gratuity) Rs. 71,04,400 a sem chhuak a. Sipai báng fa mi 14 hnenah stipend/scholarship Rs. 42,000 an sem chhuak bawk a, zirlai tanpuina an pekte hi degree course zir leh diploma course zirte an ni. Sipai bángte leh an thihsan (widow) te hnenah Semfex-II loan pek chhuah thin chu kumin atan an pek tawh loh thu Sainik Welfare & Resettlement department thawktute chuan Zalen an hrilh a. Loan pek a nih tawh loh chhan chu Bank lam atanga pe duh an awm tawh loh avang a nih thu an sawi. Semfex-II loan hi sipai bang emaw an thihsan ten an lak hian a pung awm chu Sainik Welfare & Resettlement department hian an pek sak thin thu kan palai an hrilh a, 2014 khan Bank-a pung Rs. 10,726 an subsidy-sak thu an sawi bawk.