ZALEN Sept. 24, 2025 : Nimin khan Kolasib District Court chuan hmeichhe naupang kum 12 mi vel khuaikhem tumtu chu kum 10 chhung jail tang tur leh pawisa chawi turin a hrem.

 Kum 2023 August ni 27 khan Kolasib nu pakhat chuan a fanu kum 12 pawh la tling tha lo chu Lalpekliana (22), Tumpui Veng, Kolasib chuan a pawngsual a ni, tiin Kolasib Police Station-ah FIR a thehlut a. He thubuai hi Kolasib Police te chuan chhui chiang nghalin, pawi khawihtu Lalpekliana chu an man nghal a, a lakah hian hmeichhe kum tlinglo pawngsual thubuai POCSO Act Section 6 leh IPC Section 376 AB hmangin an siam sak a ni.

Police ten he thubuai an chhui chianna lama an hmuh chhuah danin kum 2023, August ni 27 thim hlimah khan pawi khawihtu hi he hmeichhe naupang te chenna inah hian lutin an khum pindan ah tleirawl hi a nawr lut lui a. He tleirawl hi hlauh avanga a au bengchheng tur chu chemte hmangin a vau bet tlat a, midang tanpuitu au thei lovin a siam a ni. Pawi khawihtu hian zu a ruih bakah ganja a zu tih hriat chhuah a ni.

He thil thlen lai vela an thawm lo hre pha an thenawmte an inrawlhna a zarah he tleirawl hi pawi khawihtu hian a khawih chhe hman lo hlauh a ni. 

He thubuai hi Court chuan nimin khan rel zovin Judgment & Order chu Kolasib Fast Track Court Judge R. Vanlalena chuan puangin, pawi khawihtu Lalpekliana chu hur sualna lam hawia hmeichhe naupang a khuaikhem avangin kum 10 chhung jail tang turin a hrem a, chemte hmanga a vau beh avangin IPC Section 506 hnuaiah kum 5 chhung jail tang turin a ti bawk.

Hei bakah hian tleirawl taksa timualpho zawnga a phelhruah avangin IPC Section 354B hmangin kum 3 chhung jail tang turin a ti bawk. Pawikhawihtu hian Rs.15,000/-a chawi tel dawn a ni. Jail tan hun tur bithliah te hi inchher chhuan lovin a vaiin a kal rual dawn a ni.