Kum 11 chhungin KTP member 5,000 chuang thi

ZALEN September 29, 2024 : Tun hnai kum 11 chhungin Mizorama kohhran lian ber, Presbyterian Kohhrana Kristian Thalai Pawl (KTP) member thi mi 5,279 an awm a, chung zinga mi 4,632 (87.74%) zette chu mipa an ni a. Data atanga a lan danin, thalai thi zingah hmeichhia aia mipa tamna a sang hle.

ZALEN-in data a hmuh theih china tar lan a nih danin, tun hnai kum 11 (2013-2023) chhunga KTP member boral tam ber kum chu kum 2022 kha niin, hemi kumah hian KTP member mi 643 an thi a, KTP member thi zinga mi 567 chu mipa niin 88.18% a tling.

Kum 2020-ah KTP member thi an tlem ber a, mi 422 an thi a, an zinga mi 386 (84.64%) chu mipa niin hmeichhia 70 thi an awm bawk.

Central KTP-in a chhinchhiah, tun hnai kum 11 chhunga KTP member thi zawng zawng 5,279 zinga zaa 87.74% (4,632) zette chu mipa an ni a, mi dang zaa 12.25% (647)-te chu hmeichhia an ni.

KTP ni lo, kohhran thalai pawl hrang hrang report-ah pawh mipa thi an tam zawk thin a, hei hi member-ah mipa an tam zawk vang ni tho mah se hmeichhe thi zat nen a inthlauh chhan hi chhui tham a tling hle niin ZALEN thudawnna pakhat chuan a sawi.

Baptist Church of Mizoram (BCM) hnuaia Thalai Kristian Pawl (TKP)-ah pawh kum 2022 chhung khan member 150 thi an awm a, an zinga 131 (87.03%) mipa an ni a, hmeichhia 19 an ni a. Kum 2023-ah TKP member thi 173 awmin mipa 150 (86.70%) leh hmeichhia 23 an ni.

Hetihlai hian Economic & Statistics Directorate-in kum 2011 atanga 2022 inkara Mizorama thi zat an tar lanah kum tin mipa an thi tam zawk vek a, kum tina thi zawng zawng atangin mipa thi zat 60% chung lam vek a ni.

Hetiang a nih avang hian Mizorama vote nei thei zingah pawh kum eng emaw zat kalta atang khan mipa aiin hmeichhe vote nei an tam zawk zel tawh.

KTP member boral zat : CKTP report-

Kum Mipa Hmeichhia Total

2013 395 54 449

2014 388 40 428

2015 421 46 467

2016 417 49 466

2017 405 64 469

2018 429 42 471

2019 386 70 456

2020 354 68 422

2021 386 70 456