Aizawl: Mizoram Remote Sensing Application Centre (MIRSAC) chhin-chhiah danin kum 120 kalta chhung khan India hmarchhakah hian lirnghing lian tham (Magnitude 7 aia na) hi tum 18 zet a thleng tawh a, lirnghing intanna zingah Mizoram pawh a tel. Zalen palaiin MIRSAC hotute hnen atanga thu a dawn danin Bureau of Indian Standards-in kum 2002-a Seismic zone map of India an siam tharah India hmarchhak pumpui chu a hlauhawm ber lai, zone V-ah a dah tih sawiin hetia lirnghing laka a hlauhawm viau chhan hi mithiamte chuan hmar lama Indian plate leh Eurasian plate te innawrna bakah khawchhak lama Indian plate leh Burmese plate te innekna vang a ni, an ti a. A tlangpui thuin Mizoram hmar aiin chhim lam chu lirnghing lo thleng palh thei lakah ziaawm deuh hlek tura chhut a ni. Lirnghing na vaklo chu Mizoram in a tuar zeuh zeuh tih MIRSAC thawktute chuan sawiin kumin 2016 chhungin lirnghingin Mizoram a sawi/nghing liantham tum thum a tawng tawh tih Zalen a hrilh a. Heng zingah hian hmanni lawk, October 26, 2016 chhun lai dar 12 vela rawn nghing kha Chhipphir khaw piah Bualpui V (Lunglei Dist.) khaw bul lawk atanga rawn nghing tan a ni tih an sawi. MIRSAC thawktute chuan Mizoram chu India hmarchhak chhim lama awm, Purvachal Himalayan tlangdung chhim tawp bera awm a ni tiin heti lai hmun hi leilung insiamremna tura an innawrna hmun nia ngaih a ni a. Hei vang hian lei khichat (faults & lineaments) hmun engemawzatah a awm a. Amaherawhchu heng zinga tam tak hi chu lirnghing thlen tham loa tenau te an ni a. Mizoram tan tlang tu ‘Mat Fault’ erawh hi chu mi thiamte’n lirnghing thlen thei a nih leh nih loh an zirchiang mek tih an sawi bawk. ‘Lirnghing hi leilung sakhatah chuan a hlauhawmin, a na bik a, leilung thawl, Mizoram angah hian tlemin a zia-awm deuh’ tia ngaihdan chungchangah mi thiamte ngaihdan pawh a inang lo tih Zalen a hrilh. MIRSAC thawktute chuan, “Mizoram hmun tam tak hi leilung nghet lo hrim hrim anih avang te, ram awih avang te, hmasawnna avanga leilung kan tih danglam avang te hian lei min hlauhawm lai a awm nual a, a bikin heng lai hmunah hian lirnghingin leimin a thlen theih avangin fimkhur a ngai lehzual a ni,” an ti a. Eng tikah nge lirpui chu a lo nghin ang tih hi a zir chiangtute ngei pawhin an sawi thei bik lo a, chuvangin tul lova lo phili leh lo buai chung a sawt lova, lo insawithaih chiam chi pawh a ni hek lo tih Zalen a hrilh bawk.