American football star Tom Brady leh a nupui Brazilian model Gisele Bundchen te chuan an inthen thu an puang ve leh ta tlat mai le. Kum 13 chhung inneiin fa pawh pahnih nei tawh mah se an inkawp rem thei tawh lo a, thenna biah thu an inhlan ta nge nge a ni.

Kum 45 mi Brady leh Bündchen (42) te hian Instagram story-ah Zirtawpni zan khan an inthen thu hi an tarlang a, a hnuah an inthen ngei thu hi an nemnghet zui leh bawk. Brady chuan, "Kei leh ka nupui Bündchen chuan kum 13 kan inneih hnuah inthen turin thlutlukna kan siam ta a ni. Kan fate tan nu leh pa kan ni reng dawn a, an tan theihtawp kan chhuah zui zel dawn bawk a ni," tiin an inthen chungchang hi a tarlang.

Brady leh Bündchen te hi an inkar hi a tha lo tih media ten an lo tarlang tawh thin a, a tawpah chuan a puak keh ta nge nge a ni.

Nupa duhawm

Tom Brady leh Gisele Bundchen te hi an eizawnna kawngah mi hlawhtling tak ve ve an ni a, lar pawh an lar hle. Brady hi NFL history-a player ropui leh hming dai tawh ngai lo tur zinga mi a ni a, a hlawhtlinna chan zo zai sawi sen a ni lo. Bundchen pawh a hun laia khawvela model hlawh hnem ber ni phak ngat a ni a, kum eng emaw zat chung chu khum thei an awm lo hial.

Kum 2006 atang khan an inzui tan a, hetih hun lai hi Brady leh a tawih Bridget Moynahan an inthen hnu lawk a ni nghe nghe. An inngaizawng tih hriat a nih hnuah an chanchin hian ngaihven a hlawh chho hle a, kum thum chuang an inzui hnuah February 2009 khan Santa Monica an innei zui. Hemi kum hian fapa Benjamin an nei zui a, kum thum huah fanu Vivian an nei leh bawk.

Nupa duhawm leh mite awh rawn an ni a, sum leh paiah harsatna an tawk lo bawk. Chutihrual chuan an nupa inkarah harsatna neuh neuh a awm chho a, Brady pawh hian ni 11 chhung chu a team te kiangah hun hmang thei loin hun harsa a lo hmachhawn tawh. New England Patriots tan season 20 zet hun a hman hnuah kum 2020 khan a chhuahsan a, hemi tum hian NFL career a ngaihpawimawh thu a sawi.

Mahse a hmagaih NFL hi a chawlh san thu a puang zui a, chhungkaw lamah harsatna an neih vang niin thenkhat chuan an tarlang a ni. Mahse trun hnai khan NFL-ah hian a kir leh thu a puang a, a hu lawkah an inthen thu hriat tur a awm zui nghal bawk. Tom Brady leh Gisele Bundchen te inkar hi a tha lo fo tih an sawi a, a tawpa tawpah chuan inthen turin thutlukna an siam ta nge nge a ni. Bundchen pawhin an fate enkawl kawngah theih tawp an chhuah dun zui tur thu a tarlang a, an mimal nun zahsak turin a ngen bawk.