ZALEN, June 14, 2026: Mizoramah kumin chhungin Rs. 4,37,02,000 hu bungraw kang chhia a awm tawh a, hetihlai hian tun hnai kum 15 chhungin kangmei vanga thi mi 51 an awm.

Fire & Emergency Services department chhinchhiah danin kumin chhungin chenna in kang 26 a awm tawh a, ram kang 57 awm tawh bawkin kumin chhungin kangmei vanga thi leh hliam tuar an la awm lo.

Kangmei chhuah nasat ber thla chu March niin in kang 10 awmin ram kang 28 a awm a, bungraw kang chhia hlut zawng chu Rs. 1,69,94,500 hu a tling. 

Nikum chhung khan Rs. 4,68,84,530 hu bungraw kang chhia a lo awm tawh a, nikum khan Mizoramah chenna in kang 31 awmin ram kang 164 a awm a, thi pakhat leh hliam tuar pakhat an awm bawk.

Nikuma kangmei chhuah nasat ber thla, March-ah chenna in kang paruk awmin, ram kang 92 a awm a. Hemi thlaa bungraw kang chhia hlut zawng chu Rs. 3,00,62,330 a tling. 

Kum hmasa, 2024 chhung khan kangmei chhuak vanga bungraw chhia Rs. 8,84,57,960 hu a awm a, kangmei vanga thi pali an awm.

Kum 2012 atanga kumin 2026, kum 15 chhungin Mizoramah kangmei vanga thi mi 51 an awm tawh a, kangmei vanga thi awm tam ber kum chu kum 2022 niin mi 15 an awm.

Fire & Emergency Services hotute chuan kangmei chhuak thei pumpelh nan electric wiring uluk taka siam a, MCB hmang theuh turin chhungkaw tin an ngen a, gas hmanga eirawngbawl leh thing tuah thuk hmangte pawhin thuk hman zawhah uluk taka timit turin an ngen bawk.

Ram kalten ram kalnaa an mei tuah/chhem tha taka timit tur leh ar leh vawk vulhten an ran vulhna atanga kangmei tichhuak thei thuk leh electric hrui zam uluk zawk thlithlai reng turin an ngen a, mi tupawhin zial zuk bung timit tha loa khawi hmunah mah paih loa kang mai thei thil - petrol/diesel/ gas/khawnvartui zuarten kang thelhna hmanrua (fire extinguisher/ sand bucket) inchhawp ngei tura ngen bawkin, hei bakah hian kangmei a chhuaha tanpuitu kan kohin chhiatna thlenna hmun chiang taka hrilh thin turin mitin te an ngen.