DOWNLOAD OUR APP

Read latest news on your phone
app-store

Kum 15 chhungin sikul 15 chhunfin a ni tawh

Aug 13, 2016

Kum 15 chhungin sikul 15 chhunfin a ni tawh

Aizawl: Mizoramah kum 2015-16 khan sawrkar enkawl zirna in hmun 15 ah chhunfin a ni. School Education Director Lalthawmmawia, IAS in Zalen palai a hrilh danin sawrkar school chhunfin hi primary school a ni deuh ber a, chhunfin a nih chhan chu zirna in thenkhat chuan zirlai naupang nei tlem hle mahse zirtirtu an awm tho a ngaih avangin anmahni hnaih deuha awm school dang nen chhunfinin zirtirtu pawh daih zai zawka a sem theih dawn vang a ni, a ti. Zalen palai zawhna chhangin School Education hotute chuan District tina education officer te chu anmahni bial chhungah zirlai naupang nei tlem lutuk te thlithlai a, chhunfin theih a nih dan te rawtna siama Directorate a thehlut tura tih an nih thin thu an sawi a. Khua leh veng thenkhatte chu an veng huam chhunga zirna in awmte chu hman tangkai a nih zawk theih nan chhunfin dilte an awm thin thu an sawi a. School chhunfin a nih dawn hian Education department chuan khawtlang hotute rawnin VC leh tlawmngai pawl lamte inrawnkhawm leh inhrilhfiahna a buatsaih thin thu sawiin hetih lai hian VC leh tlawmngai pawl hruaitute an inthlak avanga school chhunfin pawm vek tawh sawisel a chhunfin ti tawp tura ngenna te an dawn leh thin thu an sawi a. School chhunfin tawh tih danglam an duh thinna chhan chu mahni veng bilah zirna in awm ve reng reng se an duh thin vangte a nih thu Zalen palai a hrilh. Sawrkar enkawl hi School engemaw zat chu chhunfin a ni tawh lai leh chhunfin a nih mek lai hian Right to Education norms ah elementary bikah chuan naupang school kalna chu anmahni chenna atanga kilometre khat aia hla ni lo tura tih a nih angin zirlai naupang tana hla lutuk tur ang chi school erawh chhunfin a ni lo thung.
Share now