Aizawl: Global Adult Tobacco Survey (GATS) North East India, 2016-17 tarlan danin Mizorama kumtlinglo (minor) zaa 27-te zingah vaihlo kaihhnawih a hluar hle a, heng vaihlo kaihhnawih an tih tan kum hi a chawhrualin kum 17.8 a ni. GATS record thar berin a tarlan danin kumtlingloin vaihlo an khawih tan kum hi chawhrualin Mizoramah chuan kum 17.8 a ni a, hetah hian mei zuk tan kum chawhrual hi kum 17.5 niin zuk loh chi vaihlo atanga siam dang an tih tan kum chawhrual hi kum 18.3 a ni. North East India-ah Mizoram hi a 5-na niin Sikkim-ah vaihlo khawih tanna kum chawhrual a tlem ber a, vaihlo hman tanna kum chawhrual chu kum 15.9 a ni. Arunachal Pradesh-ah kum 16.2, Nagaland-ah kum 17.2, Meghalaya-ah kum 17.5, Assam-ah kum 18.5, Tripura-ah kum 19.5 leh Manipur-ah kum 20.8 niin India ram puma hman tan kum chawhrual hi kum 18.7 a ni. Ruihhlo hluar lam hi Mizoramah hian kumtlinglo zinga 27%-ah a hluar niin GATS chuan a tarlang a, North East state-te zingah Mizoram chu a  a hluarna ber a ni a. A dawttu hi Arunachal Pradesh niin 25.1% a ni a, Meghalaya-ah 12.6%, Tripura-ah 11.6%, Nagaland-ah 11.3%, Assam-ah 9.1%, Manipur-ah 9%, Sikkim-ah hian 0% a ni a, a hluar loh berna hmun a ni. India ram pum pui naupang zinga zaa 4.4 ah a hluar a ni. Mizoram chu meizuk hluarna ber niin zuk loh chi vaihhlo atanga siam dang chu Arunachal Pradesh-ah a hluar ber a ni. North East State mipuiten vaihlo atanga siam an khawih tam ber berte chu sikret, khaini, pan masala, zarda kuhva, gutkha leh bidi te a ni a. North East state mipuite vaihlo hman dan kum 2009-10 leh 2016-17 record khaikhinah record hnuhnung zawk (2016-17)-a vaihlo hluar zawng tlakhniamna state-te chu Nagaland, Mizoram, Meghalaya leh Arunachal Pradesh te a ni a, san lam pan state te chu Tripura, Assam leh Manipur te an ni. India ram puma vaihlo hluarna ber chu Tripura a ni mek a ni.