Aizawl December 2, 2023 : Mizoramah kumin 2023-ah December ni 1 thleng khan ruihhlo vangin mi 68 an thi tawh a, tun hnai kum 19 chhunga ruihhlo vanga thi an tam ber kum a ni tawh.

Excise & Narcotics department (END) chhinchhiah danin, ruihhlo vanga kumina thi mi 68-te chu mipa 57 leh hmeichhia 11 an ni. Ruihhlo vanga thite chu heroin leh ruihhlo dang tih pawlh vek an ni.

Excise department chuan kum 1984 atang khan ruihhlo hman sual vanga thi hi chhinchhiahin tun thlengin mi 1,804 an thi tawh a, chungte chu mipa 1,586 leh hmeichhia 218 an ni.

END te'n kumin chhungin Mizoram ah heroin kg 76.219 zet man an nei tawh a, hei hi kum khat chhunga heroin an man tam ber a la ni. Nikum chhung khan heroin kg 33.418 man an nei a, hei hi kumin a an man tawh zatve vel chauh a ni.