ZALEN February 27, 2026 : Mizoram Pradesh Congress Committee chuan vawiin khan Political Session an nei a, MPCC Treasurer Lalmalsawma Nghaka chuan thu sawi in, "ZPM sawrkar hian 2023 inthlan dawn khan, ‘Puktu ni lovin, puk tirtu kan ni ang,’ tiin an sawi a. Kumina kan budget hi vbch 17469.92 a nih laiin kan leiba hi vbch 19085.15 a ni mek a, kan leiba hi kan budget aiin a sang ta der mai. Kum 2 chhungin vbch 6375.86 in a pung hman a, an term tawpah phei chuan vbch 25,000 chuang a ni hman dawn niin a lang," a ti.

"MNF sawrkar khan leiba a ngah thu hahipin kan sawi a, mak kan ti a. Vawiina kan sawrkar hrawn mek hi sum leh pai enkawl thiamah inngai mah se, an thiam loh zia a lang a, chhiarkawp thiam pangngai chuan a punna hi kan hrethiam vek a ni. Congress khan leiba a pun loh nan theihtawp kan chhuah a, kan sawrkar loh hun kum 7 chhung hian leiba lamah hma kan sawn a, ZPM sawrkar hi Leiba tih pun lamah an rawn champion chho mek a, MNF sawrkar a rawn pel ta a ni" a ti bawk.

Lalmalsawma chuan, "Kum 2023 inthlan campaign lai khan minister-te khualliana an tang thin kha tul lo an ti hle a. Tunah hian CM chauh pawh hi vawi 94 khuallian-ah a tang tawh a, hnathawh ni (working days) atanga chhutin khualliana a tan ni hi a tam lutuk a ni," a ti.

MPCC Treasurer chuan, "MNF khan kan sum leh pai dinhmun nasa takin an tichhia a, chung zawng zawng nuai bo intiam ZPM te hian eng nge an tih? PWD deptt. ringawta December restricted tender Amount kum 2 chhung belhkhawm chu ₹10,67,98,54,293/-(Vaibelchhe sangkhat sawmruk pasarih, nuai sawmkua pariat, sing nga, sangli, zahnih sawmkua leh pathum) a ni tawh a. Heng hna aṭangte hian GST 18% leh Labour Cess 1% la ta nise, sawrkar sum hum tur chu ₹202,91,72,315.67/- (Vaibelchhe zahnih pahnih, nuai sawmkua pakhat, sing sarih, sanghnih, zathum sawm panga) a ni. Pu Zoramthanga te sawrkar pawh khan em em an tih a rinawm hle. 'Ka ti ve lovang’ ti te hian quarters sak thlenga restricted tender an ti thil dik lo chu a ni," a ti.

Kawng chunngchang sawiin, "Kum 2 chhung kawng chhia mipuiin kan tawrh tawh hnuah an rawn siam a, social media lama an rawn infak vak hi a zahthlak. Kan kawngte hi mipui chhiah atanga siam a ni a, mipui siam zawk a ni. Mipuiin oil kan thun apiangin litre-ah cheng 2 kan thawh a, lirtheia eizawngte hian thla tin Rs. 1000 chuang thawh ziah ang an ni a, Sawrkar hian mipuite hnenah lawmthu a sawi tur a ni. Kan sawrkar hi insawi theih lamah chuan an champion a, a tiha tih lamah chuan a champion si lo va, a vanduaithlak hle," a ti.

AMC inthlan lo awm tur chungchang sawiin, "MNF leh ZPM te hian mi lar leh mi hausa an thlang chhuak a. Congress chuan mipuite tana rawng lo bawl thin, midang te tana nun lo hlan thin, khawtlang leh ram tana mi inhmang mi kan thlangchhuak a, Congress hi danglamna (change) thlen tum tak tak chu kan ni. Congress hi mipuiin min en mek a, huaisen tak leh dik takin kan kal zel a, Pathian malsawmna chang turin theih tawp kan chhuah mek a ni," a ti bawk.