Aizawl: Kum 2014 aiin kum kalta 2015 ah rui chunga lirthei khalh, Traffic Police ten an man an tam zawk. Traffic Police chhinchhiah danin kum 2014 khan rui chunga lirthei khalh mi 541 an man laiin kum 2015 ah chuan 817 an man. Kum 2015 chhunga Traffic Police in lirthei dan bawhchhia an man zingah two wheeler an tam ber a, 10594 manin LMV 3479 in a dawt a. Taxi 2622, HMV 941 leh Bus 90 an man a, heng an man atanga an pawisa chawi tlingkhawm chu Rs. 3,954,551 a tling a ni. Lirthei man chhan zingah a dahna hmun lova lirthei dah 'no parking' vanga man tam berin 5351 an awm a, driving license neilo chunga khalh 1658 leh dan/signal zawmloh vanga man 937 ten an dawt veleh a ni. Traffic SP C.Lalthanmawia chuan mitinte hawihhawm tlangin midangte ngaihchan nachang hria ila tuna Aizawl Traffic buaina chuan ziaawm lam a pan ngei a ring tih Zalen a hrilh a. "Kan harsatna sutkianna tha ber chu midangte tana hnawk lova awm hi a ni a. Lirthei khalhtute hian midang ngaichang chungin thilti thin ila, tuna kan harsatna tam zawk hi kan pumpelh thei a ni," a ti bawk.