Aizawl: Kum 2015 chhungin Mizoram ah ruahtui 2412.3 milimetre a tla a, August thla ah ruahtui Mizoram in a dawng hnem ber. State Meteorological Centre, Directorate of Science & Technology in an chhinchhiah danin nikum 2015 chhung hian August ah Mizoram chuan ruahtui a dawng tam ber a, August thla chhung hian ruahtui 486mm a tla a, February thla tihloh thla tinin ruahtui tlaa awm ziah a ni. Ruahtui hi January ah 8mm, March ah 40.8mm,April ah 241.8mm, May ah 189.8mm, June ah 429.1mm, July ah 418.2mm, August ah 486mm, September ah 356.1mm, October ah 233.4mm, November ah 3.7mm leh December ah 5.4mm te a tla a ni. Chhinchhiahna atanga a lan danin nikhata ruahtui tlak tam ber tum chu September ni 15,2015 a ni a, hemi ni hian 121milimetre a tla. State Meteorological Centre chhinchhiah danin nikum chhung khan chawhrualin December ah khua a vawt ber a, March thla ah khua a lum ber thung. December thlaa khaw vawh lam chawhrualhi 8.05 degree celcius a ni a, January 8.44 celcius leh February 9.4 celcius ten an dawt a ni. Chawhruala khaw lum ber thla March niin 28.40 degree celcius a tling a, May a khawlum lam chawhrual chu 27.64 degree celcius chuan dawtin June thlaa khaw lum lam chawh-rual 27.36 celcius in a dawt veleh a ni. Chhinchhiahna atanga a lan danin February ni 1,2015 chu khaw vawh ber ni a ni a, hemi ni hian 5 degree celcius a ni a. Khaw lum ber ni chu April ni 14,2015 niin hemi ni a khaw lum lam hi 34.1 degree celcius a tling a ni.