Aizawl July 30, 2023 : Nikum, 2022 chhung khan Mizoramah nau piang 26,049 an awm a, thi 8,584 an awm bawk a. Nikum chhung hian nau piang zingah mipa an tam zawk a, thi zingah pawh mipa an tam zawk bawk.

Economics & Statistics department-in ‘Annual report of Registration of Births & Deaths Mizoram, 2022’ a tihchhuah atanga a lan danin nikuma nau piang 26,049 zinga 13,150 hi mipa an ni a, 12,899 chu hmeichhia an ni.

Nikum chhung veka Mizorama mitthi 8,584 zinga 5,520 hi mipa an ni a, 3,064 hi hmeichhia an ni thung a. Nikum chhunga mitthi zawng atanga mipa thi zat hi 64.30% a tling a ni.

Nikum chhung vek khan nausen thi (infant death) 380 an awm a, heng zinga 190 hi mipa niin hmeichhia 190 an awm bawk a. Mipa leh hmeichhe thi hi an inzat a. Nau thi saa piang (still birth) 78 awm bawkin an zinga 43 hi mipa niin hmeichhia 35 an awm bawk a ni.

Mizoram district zinga Aizawl district-ah nau piang tam berin 9,607 an piang a, Lawngtlai chuan dawtin Lunglei district chu pathumna a ni a. Mitthi pawh Aizawl district-ah tam berin Lunglei leh Lawngtlai district-in an dawt a ni.

Chhinchhiahna atanga a lan danin kum 2018 atang khan nau piang leh mitthi hi a kum telin a pung chho hret hret a. Naupiang hi kum 2018-ah 20,984, 2019-ah 23,808, 2020-ah 23,320, 2021-ah 24,314 leh nikumah 26,049 an awm a. Mitthi pawh pung chho hret hretin kum 2018-ah 5,525, 2019-ah 6,606, 2020-ah 6,703, 2021-ah 8,101 leh 2022-ah 8,584 te an awm a ni.

Economics & Statistics department-in Mizoram chhunga Registrar of Births & Deaths 869-te atanga data a lakkhawm hmanga nikum chhunga district hrang hranga nau piang leh mitthi awm zat:

District           Piang     Thi 
Mamit            2071      438
Kolasib           1611      567
Aizawl            9607      4022
Champhai      2165      608
Serchhip        617        399
Lunglei          3088      851
Lawngtlai      3440      703
Siaha             1755      315
Saitual           663        226
Khawzawl      611        246
Hnahthial      421        209
Total             26049     8584