ZALEN December 14, 2025: Nikum, 2024 chhung khan Mizoramah mitthi 8,777 an awm a, thi zinga 5,704 chu mipa niin hmeichhia 3m073 an ni a. Nikum chhunga Mizoram mitthi zinga hmeichhia aia mipa an tam zawkna hi 2,631 niin a let deuhthawin mipa thi an tam zawk.

Economics & Statistics Department-in tun hnaia ‘Annual report of registration of births & deaths Mizoram, 2024’ a tih chhuah atanga a lan danin nikum chhung khan Mizoramah nau piang 29,615 awmin heng zinga 14,857 hi mipa an ni a, hmeichhia 14,758 an awm bawk a, piang (birth rate) hi 20.118% a ni.

Report tar lan danin nikum chhung khan mipa 1,000 zelah hmeichhia 993 piang anga chhut a ni. 

Nikum chhung vek khan Mizoram pumah mitthi 8,777 an awm a, heng zinga 5,704 chu mipa an ni a, hmeichhia thi 3,073 an awm bawk a, thi (death rate) hi 5.96% a ni.

Nikum vek khan naupang thi (infant death) 259 awmin naupang thihna (infant mortality rate) 8.75% a ni a. Nau thi saa piang 82 awm bawkin thi saa piang (still birth) rate hi 2.76% a ni bawk. 

Annual Report of Registration of Births & Deaths Mizoram, 2024 tar lan danin Mizoram district 11 zingah Mamit, Champhai, Lunglei, Lawngtlai leh Hnahthial district-ah te hmeichhia aiin mipa piang an tam zawk a. Kolasib, Aizawl, Serchhip, Siaha, Saitual leh Khawzawl district ah chuan mipa aiin hmeichhia piang an tam zawk thung.

Nikum bikah hian Aizawl district-ah piang tam berin 12,174 an awm a, Lawngtlai district chuan dawtin piang 4,815 an awm bawk a, Khawzawl district chu nau piang tlemna ber niin piang 279 an awm.

Economics & Statistics department thawktute chuan Aizawl district-a nau piang an tam ber chhan hi district hrang hrang atanga Aizawl khawpui damdawi ina nau nei an tam vang a nih thu Zalen an hrilh. 

Thi zingah pawh Aizawl district-ah thi tam berin mitthi 3,877 chhinchhiah a ni a, Lunglei district chuan dawtin thi 1,064 an awm nia chhinchhiah a ni.

District 11 zingah Khawzawl district chu mitthi awm tlemna ber niin mitthi 115 chhinchhiah a ni a. Aizawl leh Lunglei district-a thi an tam chhan pawh hi damdawi in hrang hranga thi an tam vang nia thudawn a ni.

Annual report tarlan danin nikum chhunga Mizoram nau piang leh thi hi Mizoram hmun hrang hranga Registration of Births & Deaths 881 (damdawi in hrang hrang 116 leh tual chhung RBD 765)-ten an bial chhung theuh atanga report an lakkhawm an ni a. Birth rate hi tun hnai kum riat chhung vel atang khan a chhe hle a, 20% pawh a tling ngai lo a, nikumah erawh sang deuhin 20.11% a tling a ni.

Chhinchhiahna atanga a lan danin tun hnai kum 13 (2012-2024) chhunga nau piang tlem ber chu kum 2018 kha niin nau piang 20,984 an awm a, hemi kuma birth rate hi 16.25% a ni. 

Key Dates & Points

District     Piang  Thi

Mamit     1719   317

Kolasib     1711   683

Aizawl     12174  3877

Champhai   2572   915

Serchhip     834   425

Lunglei     3487   1064

Lawngtlai    4815   731

Siaha     1034   245

Saitual     616   193

Khawzawl   279   115

Hnahthial    374   212

Total     29615   8777