ZALEN July 12, 2026: Mizoram Police chuan nikum chhung khan hliam leh thihna thleng lirthei chetsualna (accident) tum 85 chhinchhiahin heng zingah hian tlan chak vanga chetsualna thleng a tam ber.

Mizoram Police chhinchhiahna atanga a lan danin nikuma lirthei chetsualna thleng 85 zinga 50 hi tlan chak (over speeding) vanga thleng niin hei hi lirthei chetsualna thleng zawng zawng atanga chhutin 58.82% a tling.

Pahnihna chu ruih (zu leh drugs kaihhnawih) vanga thleng niin hemi kaihhnawihah hian accident tum 14 a thleng a, hei hi a pum pui atanga chhutin 16.47% a ni.

Lirthei chetsual dan chungchangah kawng atanga tlan liam chu tam berin 38 a awm a, hei hi accident zawng zawng atanga chhutin 44.70% a tling a, lirthei insu vanga chetsualna thleng chu pahnihna a ni thung.

Lirthei chetsual hun tar lanah khaw ên that lai (sunny/clear) chhunga chesual tam berin 76 a awm a, hei hi nikum chhunga lirthei chesual atanga chhutin 89.41% a ni a. Lirthei chetsualna hmunah kawng tha lai national highways-ah thleng tam berin tum 45 a thleng a, pahnihna chu state highways-ah niin tum 25 leh kawngpui dangah tum 15 a thleng bawk.

Lirthei chesual zingah a hlui aiin a thar an tam zawk a, lirthei chesual tam ber hi kum nga la tling lo niin 33 an chesual a, kum nga atanga kum 10 inkar chesual 30 an awm bawk.

Chhinchhiahna atanga a lan danin lirthei chesualte hi an phurh zawh tawk phur (normally loaded) tam berin chesual zinga 60 chu an phurh tawk phur an ni a, lirthei ruak chesual 15 awmin overload vanga chesual pakhat chiah a awm a ni.

Mizoram Police chhinchhiah danin nikum chhung khan hliam leh thihna thleng lirthei chetsualna hi tum 85 thlengin thi 95 an awm a, hliam na tuar 31, hliam tenau tuar 38 an awm a. Nikum chhunga accident vanga harsatna tawk hi an vaiin mi 164 an ni. 

Mi thiamte chhinchhiah dan chuan kum tin khawvelah lirthei chesual hi tum nuai 4.5 thleng ang leh hemi kaihhnawihah hian thi 1,60,000 bakah hliam 4,20,000 awm ziah angin an chhut a, thi zinga 70% hi thalai nia chhut a ni.

Khawvel puma lirthei awm zinga 1% hi India rama awm nia ngaih niin hetih lai hian khawvela lirthei chetsualna thleng zinga 11% vel hi India rama thleng nia chhut a ni bawk.