ZALEN January 11, 2026: Nikum 2025 chhungin Mizoramah ruahtui 2541.6 mm a tla a, ni khata ruahtui tlak tam ni ber chu August ni 26, 2025 niin hemi ni hian ruahtui 98.2 mm a tla.

ZALEN zawhna chhangin Science & Technology Department thawktute chuan nikum 2025 chhunga Mizoram sik leh sa chawhrual chu 22.4°C a ni tih sawiin chawhruala lak chuan khaw lum leh vawh chungchangah danglam lutuk a awm lo tih an sawi. 

Kum 2025 chhunga khaw vawh (temperature hniam lai) ber chu January 9 a ni a, 10.0°C niin temperature san lai ber chu March 29, 30, April 2, 3, May 9, 10 a ni a, 31°C a ni an ti a. Pawimawh chu temperature hniam lai ber ringawt ni loin a san lai ber pawh hniam tel kha khaw vawh ni chu a ni thin. 

Chutiang chiah chuan khaw lum lamah pawh a lum lai bera degree sang ber kha ni ringawt loin khami nia khaw vawh lai ber (minimum temperature) a san ber chuan a lum thin tih an sawi bawk. Zawhna chhangin kum 10 kalta chhunga khaw lum ni ber chu April 13, 2017 niin 36.5°C a ni a, a vawh ni ber chu January 13, 2017 niin 2.7°C a ni tih an sawi bawk.