ZALEN January 25, 2026: Nikum chhung khan thing tiak phun tur 25,645 sem chhuah a ni a, endikna kalpui hnuah thing phun atanga 80.13% chu tha takin an nung a ni. 

Zirtawpni khan Chief Wildlife Conference Hall, Khatla-ah State Level Sub-Committee on Green Mizoram an thukhawm a. Rajeev Kumar Tiwari, Principal Chief Conservator of Forests chuan a kaihruai a, thu sawiin PCCF chuan Mizoram chu ram nuam, boruak thianghlim leh nungchate zalen taka an chenna hmun, ram leilung hausakna tha taka humhalhna hmun a nih zel theih nan sawrkara thawktute leh a chhunga cheng mipuiten thawhhona tha an neih a pawimawh tih a sawi a. 

Mizoram chu ram hring nuam tak a nih zel theih nan leilung hausakna venhim leh tih pun hna chu department pakhat hna emaw, NGO pakhat mawhphurhna bik ni lovin, a chhunga cheng zawng zawngte mawhphurhna a nih thu a sawi a. He mawhphurhna pawimawh tak hi tha taka hlenchhuah a nih theih nan inzirtirna dik leh tha pek chhuah tam a pawimawh thu a sawi bawk.

Thutkhawmah hian kum 2025 chhunga thing tiak phun tura sem chhuahte tha taka enkawl chhunzawm a nih theih nana hmalak dan tur te, ram ngaw humhalh leh thing phun pawimawhna inzirtirna uar zawka kalpui dan turte sawiho a ni.