ZALEN March 22, 2026 : Power & Electricity Department in kum 2026-2027 chhunga mipui hnena kawlphetha pekchhuahna atana sum leh pai a mamawh (Aggregate Revenue Requirement) chu vaibelchhe 761.15 nia chhut a ni a. Eng chhit man tihsan a nih dawn loh avangin sawrkarin sum indaihlohna phuhruk nana a tumsak (subsidy) tur chu vaibelchhe 175 a ni.

Zirtawpni khan Aijal Club-ah Power & Electricity Department-in kum 2026-2027 atana eng chhit man a rawtna chungchangah Mizoram Electricity Regulatory Commission (MZERC) chuan public hearing a nei a. Hemi huna P&E department thawktute tarlan danin kum thar 2026-2027 chhung hian power million units 839.04 tharchhuak tura beisei a ni a, heng zinga 553.14 million units chu Mizoram chhunga hman tura ruahman a niin state pawna hralh turin 285.90 million units ruahman a ni. Kum tharah hian distribution loss 24.50% awm tura ngaih a ni bawk.

Power & Electricity Department thawktute sawi danin kum thar 2026-2027-ah hian power hralhna atangin cheng vaibelchhe 586.15 hmuh let beisei a ni a, hengte hi Mizoram chhung atangin vaibelchhe 454.30 leh state pawna hralhna atangin vaibelchhe 131.86 a ni a. Kum thara sum mamawh zawng zawng vaibelchhe 761.15 atangin sum indaih lohna vaibelchhe 175 hi sawrkarin a tum sak dawn a ni.

Mizoram Electricity Regulatory Commission (MZERC) in public hearing an neihnaah hian mi pahnih Mizoram Consumers Union President Thanglura leh Vanlalruata, Tuikual South te hnen atangin affidavit hmangin zawhna engemaw zat a lut a, hengte hi P&E department thawktute chuan an sawifiah a ni. Public hearing-ah hian Power & Electricity Department chuan an hmalak tum dan leh sum mamawhte an sawifiah a, hengte hi MZERC chuan enfiahin March ni 30,2026 hmain thutlukna a siam dawn a ni.

Public hearing neihnaa thil pawimawh langsar zualte

* Kum thara P&E deptt. sum mamawh tarlante hi Mizoram Electricity Regulatory Commission chuan an zirchiang ang a, March 2026 chhungin ruahmanna a siam fel ang. 

* Kum 2024-2025 atangin Mizorama power hman man tihsan a la ni lo a, a hma chuan kum tin tihsan thin a ni.

* Kum thar atangin pre paid consumer siam tum a ni a, 2% rebate pek tum a ni. Pre paid hi Rs. 100 aia tlawm lovin recharge hmasak tur a ni a, a hnuah Rs. 50 aia tlem lovin recharge zel theih a ni ang a. Ni 7 hun a la awmah consumer te hnenah message hmangin recharge a hun tawh thu hriattir an ni ang a, balanace a zawh atanga ni 3 chhunga recharge a nih loh chuan an power tihtawp sak an ni ang.

* Bill pek hi online leh offline hmanga kalpui chhunzawm tur a ni. 

* Pre paid meter hi a thlawna vuah tur a ni a, a hawh man (rent) erawh chawi a ngai thung. Consumer in meter a tih chhiat chuan a chawi ang a, engemaw thildang vanga a chhia anih chuan a thlawna thlak sak a ni ang. Pre paid meter hi hmarchhak bialah chuan pakhat Rs. 10,000 man vel nia chhut a ni. Smart meter vuah hna hi Advanced Metering Infrastructure Service Provider ten an thawk.

* Kum tharah petrol pump hmun 19-ah electronic vehicle charging point dah tum a ni.

* Smart meter vuah mek hi February 2027-ah chuan zawh vek tum a ni.

* Mizorama power hloh (distribution loss) a tam chhan chu khawl lam chiangkun loh vang leh power pawt ru an tam vang a ni.

* Sawrkar kum kal mek (2025-2026) hian power hralhna atangin hlep (surplus) vaibelchhe 41.62 neih theih beisei a ni.

* Mizoram Power & Electricity Department hnuaiah (September 2025) thawktu 3280 an awm mek a, kum hmasa lam aiin 51 in an tam.