ZALEN April 12, 2026: Mizoram sawrkara taxation department-in kum liam ta, 2025-26 chhunga chhiah a hmuh zawng zawng zat chu Rs. 12,78,55,13,765 a tling a, hei hi kum 21 chhunga chhiah hmuh tam ber kum a ni.

Taxation department tar lan danin kum liam ta chhunga chhiah hmuh zinga Rs. 9,31,62,76,931 chu GST atanga hmuh a ni.

Profession tax atangin Rs. 17,00,64,331 hmuh ni bawkin sales tax atangin Rs. 2,38,53,23,620, road maintenance cess atangin Rs. 45,65,46,042, entertainment tax Rs. 70,000 leh chhiah hmuhna dang atangin Rs. 1,13,650 hmuh a ni.

Hetih lai hian taxation department hian kum 2024-25 chhung khan chhiah chi hrang hrang atangin Rs. 11,49,81,88,170 an hmu.

Sawrkar kum kalta chhung khan April, 2025-ah chhiah hmuh tam berin hemi thla hian Rs. 1,79,51,94,242 hmuh a ni a, sum hmuh tlem ber thla, August, 2025-ah Rs. 73,85,45,328 hmuh a ni.

2025-26 chhunga chhiah hmuh Rs. 12,78,55,13,765 hi kum 21 chhunga taxation department-in chhiah hmuh tam ber kum niin kum 20 liam ta, 2005-06 chhiah hmuh zat chu Rs. 45,95,99,733 a ni.

Taxation department-in chhiah an hmuh that theih nan kawng hrang hrangin hma an la tih Commissioner of State Tax HK Lalhawngliana chuan ZALEN a lo hrilh tawh a, nikum September atanga hman tan, GST rate thar hman hnuah rate thar zawm tha lo pawisa chawitir mi eng emaw zat an neih tawh thu leh chung mite pawisa chawi chu Rs. Nuai 10 chuang a tlin tawh thu a lo sawi tawh bawk.