Aizawl District Football Association (ADFA) chuan kum 25 an tlin lawmna kal zelah hmachhawp lian tak tak an nei a, heng zingah hian inter-village tournament buatsaih pawh an tum.

May 5 khan ADFA hian Art & Culture Auditorium, Berawtlangah Art & Culture Minister R. Lalzirliana hovin Silver Jubilee an lo lawm tawh a, tun season (2023-24) kal mekah hian an kum 25 tlin hi kawng hrang hrangin an lawm mek zel a, footballer-te tan inelna liantham pawh buatsaih zel an tum.

Aizawl district-a football hruaitute hian an hmachhawp hrang hrangte sawipuiin Thawhtanni chawhnu khan Chief Minister Zoramthanga chu a pisaah an lenchilh nghe nghe a. Inelna an buatsaih tur leh inelna an thlen tura sum leh an mamawh dangte thlenin an sawipui.

Chief minister pawhin football hruaitute thil thlen hi a lo ngaih pawimawhsak a, tihhlawhtlinsak nghal tiam thei lo mah se theihtawp chhuahpui a tum a, “Min lo dawngsawng tha hle a ni,” tiin ADFA Honorary Secretary Lalbiakhlua chuan ZALEN a hrilh.

Zoramthanga pawhin ADFA hruaitute nena an inkawm thu hi a Instagram-ah tar langin, “District football tihhmasawnna tura ruahmanna an neihte leh an mamawh an sawite kan chhinchhiah a, tih theih hun a la awm ngei pawh ka beisei,” a ti.

ADFA-in hmachhawp an neih zingah hian 1st Division League te, ADFA Cup te, 2nd Division club-te inelna te bakah February thla hian Aizawl district-a khua/veng inelna buatsaih an tum tih secretary chuan a sawi.

Hei bakah hian Mizoram Football Association (MFA) Inter-District Junior Football Tournament an thleng dawn bawk.

ADFA-in chief minister an kawmnaah hian an pawl president lo ni tawh, tuna an patron ni mek, Sports Minister Robert Romawia Royte pawhin a tawiawm nghe nghe.