ZALEN August 31, 2025:: Tun hnai kum thum (2023-2025) chhungin jail tang tlanchhuak mi 52 an awm a, chung zinga mi 23-te chu la man leh loh an ni.

Home department chhinchhiah danin kum 2023-ah mi 29 jail tang tlanchhuak an awm a, 2024-ah mi 13 leh kum kal mek, 2025-ah mi 10 an awm.

Tang tlanchhuak zawng zawng hi an vaiin mi 52 an ni a, chung zinga mi 29-te chu man an ni tawh a, tun thlenga la man loh mi 23 an la awm.

Tun dinhmunah district hrang hrangah jail 10 a awm a, August 29, 2025 thlengin mi tang 1,917 an awm a, heng zinga mi 56-te hi dam chhung tang tur (lifer) an ni.

Dam chhung tang turte hi District Jail, Lawngtlai-ah pakhat tang mekin Cental Jail, Aizawl-ah mi 55 an tang mek.

Central Jail, Aizawl-ah mi tang an tam ber a, mi 942 an awm a. Central Women Jail-ah tang 162 an awm a. District Jail, Aizawlah 137 awmin District Jail, Lungleiah 149 an awm bawk.

District Jail, Siaha-ah mi tang 60 awmin District Jail, Champhai-ah 188; District Jail, Kolasib-ah 102; District Jail, Lawngtlai-ah 24; District Jail, Serchhip-ah 72; District Jail, Mamit-ah 81 an awm a. District Jail, Saitual-ah tang an awm lo.

Jail hrang hrangte chei that tum a ni a, SASCI fund 2024-25 hnuaiah Central Jail, Aizawl leh district jail pasarih sak thatna tur hi Rs. Vbc. 55 hmuh a ni a. Construction works hi Mizoram PWD-in a thawk a, hna hi thawh mek a ni.