US singer R. Kelly chu mipat hmeichhiatna kawnga hmeichhia leh kumtling lo a khawih thin avangin thiam loh chan tir a ni a, kum 30 chhung jail tang tura hrem a ni. Kum 55 mi R&B artist hian a chunga hremna lekkawh hi a khinglet tur thu a sawi. 

A hming tak Robert Sylvester Kelly hi nikum September khan a lakah thubuai eng emaw zat ziah luh a ni a, tunkar Nilaini khan thiam loh a chang tih puan a ni ta a ni. Court-in thiam loh a chan tir hnu hian hmeichhe tam tak chuan an nun a tihchhiat sak thu an sawi a, "Ka chunga i chet dan avang khan thih hial duhna rilru ka put phah a ni," tiin hmeichhe pakhat chu a au chhuak hial. 

US District Judge Ann Donnelly chuan R. Kelly hian milar a nihna chu remchangah lain mipat hmeichhiatna kawngah nasa takin a tlan a, hmeichhe tam tak nun a tihchhiat sak a ni tiin a sawi. Hmeichhia a khawih thin zingah hian kum tling lo te pawh an tel nia tarlan a ni bawk. 

Kelly hian kum 1994 khan nupui atan American singer Aaliyah a neih theih nan Court atangin dan kalhin lehkha a siam tir tih hriat chhuah a ni. Hetih hun lai hian Aaliyah hi kum 18 mi chauh a ni a, kum 1995 ah an inneihna hi an chhu chat zui bawk.