Kum 31 hnuah AS Roma chuan semi-final second leg-ah Leicester hnehin European final an lut. Inkhelh zawh rualin mual sir lamah an coach Jose Mourinho chu lawm avangin a biangah mitui a luang.   

Leicester City-in Europa Conference League chawi tura an duhthusam ram titlawlh turin, inkhelh tan tirh lama Tammy Abraham-a goal thun chu final luhpui turin a tawk. Roma leh Leichester hi first leg lamah 1-1 in an lo inhnehtawk tawh a, nizan lamah Roma hian sikhat faia an hneh leh avangin belhkhawm-ah 2-1 in an chak a, final an lut. May ni 25 khian Arena Kombetare, Tirana-ah Feyenoord nen final an khel ang. Hetihlai hian UEFA Europa League final chu May ni 18 khian La Liga club Seville home Ramon Sanchez-Pizjuan Stadium-ah Frankfurt leh Rangers ten an khel ve thung ang.  

Mourinho chuan,"UEFA Europa Conference League final luh vanga ka mittui tlak chhan chu an feel kha ka feel thiam pui a ni. Club lian tak an ni chungin an room lamah erawh trophy hmuh tur a awm mang lo thung. Final luh kha an tan a hlut dan ka hriatthiampui a, kan ngaihtuahna a thuhmun a ni. Final kan lut thei hi a hlu ka tiin vannei ka in ti hle a ni," a ti.