Aizawl September 27, 2022 : MPYCC chuan thuchhuah siamin, state nih hnu kum 35 chhunga Mizoram leiba tlingkhawm zawng zawng let dawn chu tun kum li chhung hian leiba a tlingkhawm hman a ni, an ti.

Congress Thalai chuan tuna Mizoram leiba chu mithiam te chhut danin 12553.08(BE) a ni a, Tun term MNF sawrkar kum 4 lek chhung hian leiba hi a hma kum 35 leiba let dawn cheng vaibelchhe 5217.53 (71.59%) teh meuhin a pungchho hman a ni, an ti..

MPYCC chuan, "MNF hruaitute hian tuna Mizoram puma nasa taka sum avanga kan buaina lakah hian, mipui ngaihdan hruaipen tumin thil nihna dik tak hrulah a ni lo lam zawng an pholang nasa hle. Tunah hian Mizorama kan buaina ber chu leiba ni lovin, sum enkawl thiam lohna avanga 'a tula hman tur sum indaih lohna' zawk hi a ni," an ti.

Congress Thalai chuan, "Kan sawrkar hrawn mek MNF sawrkar hi leiba ringawtin a kal a, tun term kal meka MNF-in sawrkarna fawng an vawn tan tirha kum khat a liam hma,  kum 2019 kum tawp khan Mizoram leiba hi cheng vaibelchhe 8671.79 ah a pung chho dawrh a. Tunah phei chuan kan sawrkar hian a mamawh zat phuhhrukna tur khawp leibat tur pawh a hmu zo tawh lo," tiin, "Leiba a tam em em lai hian a tula hman tur pawisa a awm tak loh avangin sawrkar hi a talbuai ta mek a, mipui mamawh ngawih ngawih phuhrukna tur pawisa kan nei ta lo hian state pachhe tak hian harsatna nasa tak kan tawk ta a ni," an ti bawk..